Qırım aq qorçalayıcı gruppası, 2019 senesi noyabr ayında Rusiye FSBsi tarafından «devlet hainliginden» şübheli sayılıp tutulğan kişi Bağçasarayda doğğan Aqyarnıñ 64 yaşında sakini Galina Dolgopolaya olğanını bildi.
Aq qorçalayıcılarnıñ bildirgenine köre, Rusiye FSBsi qadınnı «Ukraina mahsus hızmetleri tarafından celp etilgeninde» ve «İstihbaratnıñ baş idaresinden vazife alıp, gizli arbiy malümatnı toplağanında» qabaatladı.
Daa evel haber etilgenine köre, 2019 senesi noyabr ayında Rusiye kontrolindeki Aqyarnıñ Lenin rayon mahkemesi Ukraina içün casuslıq yapqanında qabaatlanğan qadınnı eki ayğa – 2020 senesi fevralniñ 26-na qadar apiske aldı. Bu aqta mahkemeniñ saytında apiske alınğan kişiniñ şahsiy malümatı bildirilmeyip haber etilgen edi.
Qadın Rusiye Ceza kodeksiniñ 275-inci maddesine istinaden qabaatlana, oña köre, 12 yıldan 20 yılğa qadar apis cezası belgilenmesi mümkün.
Daa evel belli olğanına köre, Rusiye akimiyeti Rusiye Cenübiy arbiy okrugınıñ hızmetçisine qarşı «devlet hainligi» davasını açtı. Kütleviy haber vastalarınıñ malümatına köre, onıñ adı Ruslan Artıkov ola.
2019 senesi dekabriniñ soñunda Qırımda Rusiye quvetçileri Rusiye vatandaşı İvan Yatskinni devlet hainliginden şübheli sayıp tuttı.
