Aq qorçalayıcı teşkilâtlar Rusiye akimiyetinden Rusiye kontrolindeki Aqmescit mahkemesiniñ qararınen ekspertiza yapılması içün Aqyar psihiatrik hastahanege bir ayğa yollanılğan Bağçasaraydaki «Hizb ut-Tahrir davasınıñ» mabüsi Aleksandr Sizikovnı azat etmesini talap ete.
Bu ariza oktâbrniñ 16-nda ZMINA İnsan aqları merkezi tarafından derc etildi.
«Aleksandr Sizikov I derece saqatıdır, 2009 senesi tamamen soqurlaştı. Dindar musulman olıp, musulman ve qırımtatarlarnıñ taqip etilüvini takbih etken edi. Apiske alınmazdan evel Sizikovnı baqqan «Topçik» din cemiyetiniñ başı, siyasiy mabüs Edem Smailovğa qol tutmaq içün eki kere bir kişilik narazılıq aktsiyalarına çıqqan edi», – dep hatırlata aq qorçalayıcı teşkilât.
Olar Qırımdaki mahkeme qararından «tamamen soqur olğan insannıñ ihtiyaclarını qarşılaycaq şaraitler psihiatrik hastahanede olıp olmağanına dair malümat olmağanı içün» qasevetlene.
«Belli şarait ve başqasınıñ yardımı olmasa, Sizikovnıñ aqları bozula bile, hususan namus ve itibar ürmeti aqqı, insaniyetsiz ve aşalağan munasebetke oğramamaq aqqı ve şahsiy ayatqa sayğı aqqı bozula bile», – dep qayd etile arizada.
Aq qorçalayıcılar, Qırımdaki Rusiye akimiyeti tutulğan ve apiske alınğan insanlarnı psihiatrik hastahanelerge ilk sefer yollamay, dep qayd ete.
Yazğan arizalarında Sizikovnı psihiatrik müessisege yatqızmaq qararını «sebepsiz» dep, onıñ lâğu etilüvini talap ete, em de o ve diger musulmanlarnıñ taqibini toqtatmağa talap ete.
Aq qorçalayıcılar, halqara toplulıqnı Rusiye akimiyetiniñ böyle taqiplerini takbih etmesine ve şahsiy sanktsiyalar kirsetmesine çağıra.
Rusiye kontrolindeki Aqmescitniñ Kiyev rayon mahkemesi oktâbrniñ 14-nde Bağçasaraydaki «Hizb ut-Tahrir davasınıñ» mabüsi Aleksandr Sizikovnı Aqyar şeer psihiatrik hastahanesine mahkeme-psihiatrik ekspertizasına bir ayğa yollamağa qarar aldı.
Ukraina Rusiyeden FSB tarafından «Hizb ut-Tahrir» teşkilâtını qurğanında qabaatlanğan qırımlı Aleksandr Sizikovnı azat etmesini talap ete.
Bundan evel Ukraina prezidentiniñ Qırım Muhtar Cumhuriyetindeki temsilciligi, qırımlı Sizikovnı «ceza psihiatriyasından qorumağa» niyetlene, dep bildirdi.
Tintüvler iyülniñ 7-nde saba erte yedi qırımlınıñ evinde keçirildi: Qurman rayonınıñ Büyük Onlar qasabasında yaşağan Emil Ziyadinov, Aqmescit rayonınıñ Kurtsı qasabasında yaşağan İsmet İbragimov, Bağçasaray rayonınıñ Jeleznodorojnoye köyünde yaşağan Seyran Hayretdinov, Bağçasaray rayonınıñ Sevastyanovka köyünde yaşağan Aleksandr Sizikov, Aqmescit rayonınıñ Bavurçı (Kamenka) qasabasında yaşağan Vadim Bektemirov ve Aluştada yaşağan Dilâver Memetovnıñ evinde.
Rusiye FSBsiniñ malümatına köre, «Qırım sakinleri arasında terror mefküresini yayğan, qırımlı musulmanlarnı özüne celp etken» «Hizb ut-Tahrir» bölügini qurğanından ve iştirak etkeninden şübheli sayılğanlar tutuldı.
İyülniñ 7-nde Rusiye kontrolindeki Aqmescitniñ Kiyev rayon mahkemesi «Hizb ut-Tahrir» teşkilâtını qurğanından şübheli sayılğan Sizikovnı ev apsine yolladı. Sizikov birinci derece saqatı olı, 2009 senesi soqurlaştı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
