«ZMINA. İnsan aqları merkezi» aq qorçalayıcıları Rusiye ve onıñ işğali altındaki Qırım apishanelerinde tutulğan 96 ukrainalı siyasiy mabüsni qayd etti.
Aq qorçalayıcılarnıñ malümatına köre, 96 insandan 71-i – qırımtatarıdır.
«Eñ yañı üküm «İyegova şaatları» azası Artem Gerasimovğa çıqarıldı, onı kütken dini içün 6 yılğa üküm etkenler», – dep aytıla haberde.
Ukraina Yuqarı Radasınıñ İnsan aqları vekâletlisi Lüdmila Denisova, Rusiye apishanelerinde tutulğan ukrainalı siyasiy mabüslerniñ farqlı sayısı aydınlatqan edi: 113-ten 115-ke qadar, 80-den çoq – qırımtatarıdır. Qırımtatar resurs merkeziniñ cedvelinde 86 qırımlı siyasiy mabüs bar. Qırım aq qorçalayıcı gruppası da aynı raqam aqqında ayta.
Siyasiy mabüslerge qol tutuv programmasınıñ reberi, «Memorial» aq qorçalayıcı merkeziniñ şura azası Sergey Davidisniñ bildirgenine köre, merkezleriniñ cedvelinde 315 insan bar, 59-ı – qırımlı.
Ukraina Tış işler nazirligi, Rusiyeniñ ukrainalı siyasiy mabüslerni azat etmesinen bağlı halqara areketlerni idare etecek platforma açıldı, dep bildirdi.
Ukraina prezidenti Volodımır Zelenskıynıñ aprelniñ 20-nde matbuat konferentsiyasında bildirgenine köre, COVID-19 qırğınlığı bitkeninen Rusiyede ve işğal etilgen Qırımda tutulğan ukrainalı siyasiy mabüslerniñ qaytarılmasını talap etmege niyetlene.
