Human Rights Watch ve Amnesty International halqara aq qorçalayıcı teşkilâtları Rusiye baş prokurorı İgor Krasnovnı Yaltadaki «Hizb ut-Tahrir davasınıñ» mabüslerini azat etmesine çağıra.
«Altısı da acele ve şartsız azat etmeli, ükümleri lâğu etilmeli, bunı temin etmek içün bütün vekâletlerni qullanmağa çağıramız», – dep aytıla aq qorçalayıcılarnıñ muracaatında.
Mektüpte aytılğanına köre, «mahkemede halqara uquqta cinaiy ceza berilgen areketlerde mabüslerden iç birisiniñ alâqası isbatlanmadı».
Mektüpni imzalağanlar: Avropa ve Orta Asiyadaki Amnesty Internationa regional ofisiniñ müdiri Mari Strazers, Avropa ve Merkeziy Asiyadaki Human Rights Watch bölüginiñ müdiri Hugh Williamson.
Yaltadaki «Hizb ut-Tahrir davası» mabüsleriniñ ükümlerine qarşı istinaf şikâyetleri baqılğan Rusiyeniñ Moskva vilâyetindeki Vlasiha şeeriniñ İstinaf arbiy mahkemesine iyünniñ 22-nde Avropa Birligi temsilciligi, Felemenk Qırallığı ve Ukrainanıñ Rusiye elçihanesiniñ diplomatları keldi.
Rostov-na-Donu şeeri Cenübiy okrugınıñ arbiy mahkemesi noyabrniñ 12-nde Yaltadaki «Hizb ut-Tahrir davasınıñ» altı mabüsini koloniyada qalmasına üküm etti. Mahkeme qararına köre, Muslim Aliyev 19 yılğa, İnver Bekirov 18 yılğa, Emir-Usein Kuku 12 yılğa, Vadim Siruk 12 yılğa, Arsen Cepparov 7 yılğa ve Refat Alimov 8 yılğa üküm etildi. Olar sert rejimli koloniyada qalacaqlar.
Ukraina Tış işler nazirligi bu üküm sebebinden Rusiyege narazılıq bildirdi.
Bu dava boyunca qabaatlanğanlar 2016 senesi fevral-aprel aylarında Yaltada tutulğan edi. Olarnı Rusiyede yasaqlanğan «Hizb ut-Tahrir» islâm siyasiy teşkilâtına alâqaları bar olğanında qabaatlaylar.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
