Beyazrusiyeniñ paytahtı Minskte ükümetke qarşı narazılıq aktsiyasınıñ bir iştirakçisi elâk oldı, dep bildire Azatlıq Radiosı «Vesna» aq qorçalayıcı merkeziniñ malümatına esaslanıp.
Aq qorçalayıcılarnıñ malümatına köre, avgustnıñ 10-na keçer gecesi er adamnıñ ölümine ketirgen qafa baş yarası oldı, Pobediteley caddesinde onı mahsus tehnika urdı.
«Vesna» merkeziniñ malümatına köre, Minsk hastahanelerinde onlarnen yaralı qala.
Aq qorçalayıcılar arbiy gospitalniñ eki bölügi yaralılarnen tolu, dep bildire.
Avgustnıñ 9-nda Beyazrusiye prezidentiniñ saylavları oldı. Merkeziy saylav komissiyası, ilk malümatqa köre, şimdiki prezident Aleksandr Lukaşenko reylerniñ 80,23%-ını qazana. Onıñ esas raqibi Svetlana Tihanovskaya – 9,9%.
Saylavlarnıñ neticeleri Beyazrusiye şeerlerinde narazılıq aktsiyalarına yol açtı. Aq qorçalayıcılarnıñ malümatına köre, eñ az 140 insan tutuldı.
