Tünevin AQŞ-nda San-Diyego bölgesinde sinagogada olğan atuvlarda bir adam elâk oldı, üç kişi yaralandı.
Polis, atqan adamnı yaqaladı ve sorğuğa çeke. Adise neticesinde bir adam elâk oldı, daa üçü yaralandı. Bu hususta bölge polisi bildirmekte.
Yerli vaqıtnen saat 11:30-da Pauey (Poway) şeeriniñ polisinde, Habad Areketiniñ sinagogası yanında körüngen silâlı aqay aqqında aytıp berdiler, dep bildire “Amerika sesi”niñ rus hızmeti.
Keççe yerli akimiyet bir adam elâk olğanını bildirdi. Memurlarğa köre, cinayetniñ sebebi diniy nefret edi.
AQŞ prezidenti Donald Trump, qazağa oğrağan insanlarğa ve olarnıñ yaqınlarına taziye bildirdi.
“Tañrı epiñizni saqlasın. Şübeli yaqalandı. Polisler yahşı çalıştı. Sağ oluñız”, - denile prezidentniñ Twitterinde.
KGTV 10News yerli televizion kanalınıñ malümatına köre, eñ azından dört adam sinagogadan hastahanege ketirilgen edi.
Aprelniñ 27-sinde saat 11:00-da sinagogada Pesah bayramınıñ soñki kününiñ qutlavı başlandı. Sözde, bayram bütün künge sürip, saat 19:00-da Pesah bayram aqşamlığınen bitecek edi.
