AQŞ, dünyada koronavirus infektsiyası neticesinde ölgenlerniñ sayısı 20 biñden keçken ilk ülke oldı. The New York Times haber etkeni kibi, aprelniñ 11-inde COVID-19 neticesinde 20229 ölüm qayd etildi.
Keçken bir qaç kün devamında Amerikada bu hastalıqtan 2057 adam öldi. Ölümlerge köre ekinci yerde İtaliya, mında aprelniñ 11-inde 19468 ölüm bar edi.
Amma İtaliyada 100 biñ ealige 32 adam öldi, AQŞ-nda ise 100 biñ ealige 6 adam.
AQŞ-nda eñ çoq ölüm New York şeerinde qayd etildi.
Qırımda aprelniñ 11-inde daa bir koronavirus adisesi qayd etildi. Bu Yaltada yaşağan qırımlıdır. Umumen Qırımda 29 COVID-19 adisesi.
Aqyarda altı adam hastalandı, dört adam yahşı oldı.
Qırımda özüni tecrit etüv rejimini aprelniñ 30-ınace uzattılar, Aqyarda - aprelniñ 19-ınace.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.