Amerikanıñ Kentucky ştatında Jim Beam burbon yapıcısınıñ eki anbarında yanğında eñ azından 45 biñ viski çapçağı (qararnen 9 million litr) yandı. Şirket temsilcisi aytqanına köre, yanğın sebebini şemşek çaqmasında köreler.
Yanğın iyül 3-üne keçken gecesi başlandı. Yanğıncılar ateşni bir qaç saat söndürmege tırışqanlarına baqmadan, sabaga yaqın anbarlardan birisi bütünley yanıp bitti. Yanğınğa oğrağan adamlar yoq, dep bildire Azatlıq Radiosı.
Yanğında yoq olğan viski "yaş edi", dey Jim Beam vekili Dan Cohen. O, qaza, şirketniñ satuvlarına zarar ketirmez, dep ayttı.
Bloomberg matbuatına köre, zarar fiyatı 90-dan 300-ge qadar million dollar.
Jim Beamniñ Kentucky ştatında 126 anbarı bar, anda 3 millon viski çapçağı tura.
Jim Beam — dünyanıñ eñ yahşı satılğan burbon (amerikan mısırboğday viskisi) markası. O, 1795 senesi başlatılğan edi.
