Link açıqlığı

AQŞ cezalarına baqmadan, işğal etilgen Qırımda Rusiye bankı işke başaldı


Qırımda, AQŞ cezalarına baqmadan, «Rossiya» isse senetli bankı işke başaldı.

Bunı Qırım «baş nazirniñ birinci muavini» Rustam Temirgaliyev bildirdi, dep haber ete Qırım.Aqiqat mühbiri.

«Biz Rusiyeniñ eñ büyük banklarınıñ birisi mında işke başlaycağını çoqtan bekley edik. Bilgenime köre, bu banknıñ bayağı bölükleri açılacaq ve Qırım Cumhuriyetiniñ bank çarşısındaki liderlerinden biri olacaqtır»,– dey Temirgaliyev.

Yarımadanıñ sakinlerine nisbeten cezalar kirsetilecekmi degen sualge Temirgaliyev kirsetilmeycegini ayttı.

O şunı da qayd etti ki, al-azırda Qırımda Rusiye banklarınıñ 300 bölügi çalışa, faqat kelecekte olarnıñ sayısı 900-ge artacaqtır.

Qayd eteyik ki, «Rossiya» isse senetli bankı mart 20 künü AQŞ cezalav cedveline qoşulğan edi, nevbetteki künü Visa ve MasterCard «Rossiya» bankı tarafından çıqarılğan varaqaları boyunca ödev amelâitlarını blok etti.

İşbu bank 2014 senesiniñ birinci yarısınıñ neticesine köre, aktivlerniñ kölemi boyunca «İnterfaks-100» cedvelinde 16 yerinde turmaqta.
XS
SM
MD
LG