Aqım, Qara deñizde yanıp turğan MAESTRO ve CANDY tankerlerini Qırım yalısına yaqınlaştırdı, dep qurtarıcılarnıñ malümatına esaslanıp bildire rusiye matbuatı.
“Gemiler, qararnen 0,5 milâ süratınen Keriç boğazına yaqınlaşa. Gemicilikke telüke olsa, tankerler buksirnen çekilecek. Yani dreyfni nezaret etemiz”, - qurtarıcılarnıñ sözlerinden yaza TASS.
Rusiye deñiz-özen flotunıñ matbuat hızmetinde, gemiler oğrağan dreyf “nezaretke alınğan ve şimdi az-çoq turğun aldadır”, dep bildirile.
Yanvarniñ 21-nde Qırım yalısında Tanzaniya bayrağı altında MAESTRO ve KANDİ tankerlerinde patlav ve yanğın oldı.
«Maestro» tankeri Rusiyeniñ Temrük şeerine kete edi, anda 14 Türkiye ve İndistan vatandaşı bar edi. «Kandi» tankerinde 17 insan bar edi – olap da Türkiye ve İndistan vatandaşları. Ukrainalı jurnalist Andriy Klımenkonıñ aytqanına köre, tankerler «ABD Suriye sanktsiya cedvelinde» olğan Milenyum Denizcilik Gemi türk şirketine ait.
Rusiye Tahqiqat komiteti Qırım yalısında yanğın neticesinde tankerlerde insanlarnıñ elâk olğanı sebebinden «diqqatsızlıqtan sebep eki ve daa ziyade şahısnı öldürüv» maddesi boyunca cinaiy iş açtı.
Haber etilgenine köre, 10 insan elâk oldı, daa 12-si qurtarıldı. Yaralanğan deñizciler №1 Keriç şeer hastahanesine alıp ketirildi.
Yanğın ve patlavğa oğrağan tankerler Suriyege qanunsız şekilde şingen gaz taşığan edi, dep bildirdi Ukrainanıñ vaqtınca işğal etilgen topraqlar meseleleri nazirligi.
2014 senesi iyül ayında Ukraina ükümeti Rusiye işğal etken yarımadanıñ bütün limanlarını resmiy şekilde qapattı, Qırım limanları halqara gemiler içün qapalı qala.
