Rusiyeniñ Rostov vilâyetindeki SİZOda advokat Nazim Şeyhmambetov qırımlı siyasiy mabüsler, Yaltadaki «Hizb ut-Tahrir davasınıñ» mabüsi Muslim Aliyevnen körüşti. Bu aqta Şeyhmambetov izolâtorğa barğan soñ «Qırım birdemligine» haber etti.
«O, yarı mağaz yerde tutula, bir kişilik kamerada ve pek dımlı yerde. Bayağı yaşta olğanına baqılsa, sağlığı içün belli telüke bar. Qalğanında şimdilik şikâyet yoq», – dedi advokat.
Advokatnıñ aytqanına köre, körüşüv tahqiqat odasında degil, körüşüv odasında oldı – cam arqasında, telefon cihazları vastasınen.
Muslim Aliyev, istinaf mahkemesine azırlana, dep bildirdi.
«Ükümge qarşı istinaf şikâyetiniñ baqılması bu aynıñ 22-ne planlaştırıla. O, istinaf qararınen bağlı hayal etmey, davanıñ siyasiy sebepleri bar olğanını añlay, şunıñ içün mahkemede adalet olacağını beklemek, ne yazıq ki, kerekmey. Muslim Aliyev istinafta üküm seslendirilgen soñ etap etilecegine azırlana», – dep qoştı Nazim Şeyhmambetov.
Advokatnıñ tarif etkenine köre, qırımlı musulman Qırımdan mektüp, yollanmalarnı ala ve «Siyasiy mabüs içün iftar» teşebbüsinde iştirak etken er keske teşekkürler bildire.
«Soñki mektüpni Canköy şeerinden aldı. Pek quvançlı oldı, ruhlandırdı, aveslendirdi. İnsan azatlıqta olmasa, bu taze ava kibi kele. Aş kibi, bir yutum ayat kibi, bir yutum tazelik ve aşçatlıq kibi, yazıñız. Bu siyasiy mabüslerge pek yardım ete», – dep bildirdi Muslim Aliyevniñ advokatı.
Siyasiy mabüsniñ ömür arqadaşı Naciye Aliyeva «Qırım birdemligi» faallerine izaat berip, aqayı 2020 senesi aprelniñ 19-ndan berli Rostov vilâyetiniñ SİZOsında bir kişilik kamerada tutula, dep bildirgen edi.
İyünniñ 22-nde saba saat 10-nda Moskva vilâyetiniñ Vlasiha şeerindeki İstinaf arbiy mahkemesinde Yaltadaki «Hizb ut-Tahrir davası» mabüsleriniñ ükmüne qarşı istinaf şikâyeti baqılacaq, Muslim Aliyev 19 yıl sert rejimli koloniyada qalmasına üküm etildi.
Daa evel Muslim Aliyev Rostov-na-Donu tahqiqat izolâtorından Taganrog penitentsiar müessisesine avuştırıldı.
Rostov-na-Donu şeeri Cenübiy okrugınıñ arbiy mahkemesi noyabrniñ 12-nde Yaltadaki «Hizb ut-Tahrir davasınıñ» altı mabüsini koloniyada qalmasına üküm etti. Mahkeme qararına köre, Muslim Aliyev 19 yılğa, İnver Bekirov 18 yılğa, Emir-Usein Kuku 12 yılğa, Vadim Siruk 12 yılğa, Arsen Cepparov 7 yılğa ve Refat Alimov 8 yılğa üküm etildi. Olar sert rejimli koloniyada qalacaqlar.
Ukraina Tış işler nazirligi bu üküm sebebinden Rusiyege narazılıq bildirdi.
Bu dava boyunca qabaatlanğanlar 2016 senesi fevral-aprel aylarında Yaltada tutulğan edi. Olarnı Rusiyede yasaqlanğan «Hizb ut-Tahrir» islâm siyasiy teşkilâtına alâqaları bar olğanında qabaatlaylar.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
