Apple Amerika şirketi ilâvelerde işğal etilgen Qırımnıñ qomşu Rusiye toprağı olaraq işaretlenmesinden soñ belli davalı topraqlarnı belgilev siyasetini teşkermege başladı. Bu aqta Reuters haber ete.
Şirketniñ matbuat kâtibi Trudi Müllerniñ bildirgenine köre, bu Apple siyasetiniñ deñişmelerine yol aça bile.
«Topraqlarnı haritalarımızda işaretlemezden evel ve, qanun talap etse, deñişmeler kirsetmezden evel halqara uquqnı, ABD ve diger memleketlerniñ belli qanunlarını baqamız. Servislerimizde davalı sıñırlarnıñ işaretlenmesini tafsilâtlıca ögrenip, ileride deñişmeler kirsete bilemiz», – dep bildire Müllerniñ aytqanlarını Reuters.
Matbuat kâtibi, şirket hadimleri ileride bir çoq ilâvede davalı topraqlarnı işaretlev meselesini tafsilâtlıca ögrenmege başladı.
ABD Maliye nazirligi, Qırım «Rusiyege ait» kibi işaretlengeni içün Apple şirketiniñ areketleri sanktsiya rejimine oğraymı teşkermege vade ete.
Ukraina Tış işler nazirliginiñ spikeri Katerına Zelenko Qırım.Aqiqat Radiosınıñ yayınında Ukraina Apple Amerika şirketi öz ilâvelerinde Qırımnı Rusiye toprağı olaraq işaretlememesini talap etecek, dep ayttı.
Tünevin Ukrainanıñ ABD elçihanesi Apple Amerika şirketiniñ reberligine muracaat etip, Qırımnıñ «Rusiye» olaraq işaretlenmesini tüzetmesine çağırdı.
Ukraina Tış işler naziri Vadım Prıstayko Apple Amerika şirketiniñ ilâvelerinde «Rusiyege ait» Qırım ve Aqyarğa cevap berdi.
Apple şirketi, Rusiyede Qırım ve Aqyarnı «Ava» ilâvesinde «Rusiye» toprağı olaraq qayd etip başladı. Esas Ukrainada ve işğal altındaki yarımadada Aqyar, Aqmescit, Keriç ve diger şeerler ne Ukraina, ne de Rusiye olaraq qayd etile.
Rusiye Devlet dumasınıñ telükesizlik ve qabarcılıq ile küreş komitetiniñ reisi Vasiliy Piskarev, «Apple, Devlet dumasınıñ Qırımnıñ işaretlenmesinen bağlı iddialarını bütünley tüzetti», dep bildirdi. Bu aqta o, şirketniñ Rusiye vekili Darya Yermolinanen körüşip ayttı.
2019 senesi mayıs ayında Apple Qırım şeerlerini em esas Ukrainada, em yarımadada öz ilâvelerinde birine ait kibi işaretlemegen edi.
Daa evel Rusiye Devlet duması Apple şirketine aprelniñ 25-ne qadar, soñra ise mayısnıñ 10-na qadar «tüzetüv müddetini» bergen edi.
