Rusiye kontrolindeki Qırım Yuqarı mahkemesi oktâbrniñ 24-nde Herson vilâyetiniñ sakini 20 yaşında qırımtatarı Appaz Kurtametni apiste qaldırdı, avgust ayında Qırımtatar Milliy Meclisiniñ reisi Refat Çubarov onı Rusiye Federatsiyasınıñ uquq qoruyıcıları tuttı, dep bildirgen edi.
Rusiye mahkemesiniñ saytı haber etkenine köre, Ukrayına vatandaşı «qanunsız silâlı birleşmeni maliye etkeninde» qabaatlaylar. Kurtamet 20 yılğa qadar azatlıqtan marum etile bile.
Qırımtatar faali Elmaz Qırımlınıñ Facebookta yazğanına köre, Rusiye tahqiqatınıñ versiyasına köre, Kurtamet, Appaznıñ daa soñra bilgenine köre, "Qırım" batalyonında hızmet etken bir dostuna 500 ğrıvnâ berdi.
Kurtamet ya da advokatınıñ açıq izaatları yoq.
Refat Çubarovnıñ malümatına köre, 2022 senesi iyülniñ 23-nde Kurtamet Herson vilâyeti Geniçesk rayonındaki Novooleksiyıvka qasabasından işğal etilgen Qırımğa, soylarına ketti. O, Qırım ve Herson vilâyetiniñ memuriy sıñırındaki Rusiye keçiş noqtasına keldi. Kurtametniñ soy-soplarınen bağı üzülmedi. Bundan soñ Rusiye uquq qoruyıcıları tarafından tutuldı.
Aq qorçalayıcılarnıñ malümatına köre, Ukrayınağa qarşı büyük istilâ başlağanından işğal etilgen topraqlarda Rusiye uquq qoruyıcıları Ukrayına vatanperverleri, göñülli, cemaat faalleri, jurnalist, ATO/Birleşken quvetler teşkilâtınıñ veteranlarını sıq-sıq hırsızlap başladı. Çoqusı işğal etilgen Qırımğa çıqarıla ve SİZOğa qapatıla.
Sentâbrniñ 2-nde Aqmescitteki Rusiye mahkemesi, Ukrayına aq qorçalayıcılarınıñ malümatına köre, Rusiye arbiyleri işğa altındaki Herson vilâyetinde hırsızlağan qırımtatarı Ayder Umerovnı 5 yıl sert rejimli koloniyada qalmasına üküm etti.
Oktâbrniñ 17-nde belli olğanına köre, Qırımdaki Rusiye mahkemesi qırımtatarı Artur Memetşayevni 6,5 yılğa üküm etti, «Qırımtatar resurs merkezi» işğal etilgen Geniçeskte hırsızlağanını bildirdi.
Berilgen malümatqa köre, bu yıl iyün ayında Rusiye işğal etken Melitopolde tutulğan Ukrayına göñüllisi Yaroslav Juk Aqmescit SİZOsında tutula, onı «halqara terrorizmde» qabaatlaylar.
Bundan evel Rusiye kontrolindeki Qırım Yuqarı mahkemesi Rusiye ordusı işğal etilgen Hersonda tutqan Ukrayına vatandaşı, ATO veteranı Pavlo Zaporojetsni SİZOda qaldırdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
