«07.12 Pskovdaki №1 SİZOsına keldim, mında (mence) bazar kününe qadar olacam, belki, daa az. Soñra lagerge, yani soñki bulunacaq yerime», – dep aytıla Appaznıñ tuvğanlarına yazğan mektübinde.
Kurtamet tuvğanlarına telefon etmek içün ariza berdi, dep bildirdi. Qırımlınıñ soñki yeri daa belli degil.
Noyabrniñ soñunda Ayşe Kurtamet oğlu Nijniy Novgorodda etapta buluna, dep haber etken edi.
2023 senesi aprelniñ 20-nde Aqmescitniñ Kiyev rayon mahkemesi 2022 senesi iyül ayında Herson vilâyetiniñ memuriy sıñırından qaçırılğan Appaz Kurtametni 7 yıl sert rejimli koloniyada qalmasına üküm etti.
2023 senesi avgustnıñ 29-nda Rusiye kontrolindeki Qırım Yuqarı mahkemesi Appaz Kurtametniñ ükmüni deñiştirmedi.
Qırımtatar faali Elmaz Qırımlı Facebook saifesinde yazğanına köre, rusiyeli tahqiqatnıñ versiyasına köre, Kurtamet dostuna 500 grıvnâ bergen, soñra ise «Qırım» batalyonında hızmet etkenini bilgen.
Meclis reisi Refat Çubarovnıñ malümatına köre, 2022 senesi iyülniñ 23-nde Kurtamet Herson vilâyetiniñ Geniçesk rayonındaki Novoalekseyevka qasabasından ilhaq etilgen Qırımğa, tuvğanlarına ketti. Onıñ Qırım ve Herson vilâyeti arasındaki memuriy sıñırdaki Rusiye keçiş noqtasına sağ-selâmet kelgenini bilemiz. Bundan soñra Kurtametniñ tuvğanları ile bağları kesildi. Bundan soñ onı Rusiye quvetçileri yaqaladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
