Aqyardaki «Hizb ut-Tahrir davası» boyunca mahküm etilgen ve yanvarniñ 22-nde azat etilgen Rustem Vaitov ve Nuri Primov Aqmescitke kelip çıqtılar. Ava limanında olarnı qırımtatar faalleri, advokatlar ve tuvğanları qarşıladı, dep bildire Qırım.Aqiqat mühbiri.
Faaller, Vaitov ve Primovğa qırımtatar milliy qalpağını ediye etti.
«Bunı bağçasaraylı qırımtatar faalleri yolladı», – dep ayttı aq qorçalayıcı Lutfiye Zudiyeva.
Nuri Primov ve Rustem Vaitov evlerine kete. Vaitov – ana-babası yaşağan Eski Lez (Skvortsovo) köyüne, Primov – Aqyar civarındaki Yañı Şüli (Şturmovoye) köyüne. Anda olarnıñ Qırımğa qaytması munasebetinen dua yapılacaq.
Rustem Vaitov «terror teşkilâtınıñ faaliyetinde iştirak etkeninde» qabaatlanıp, beş yıl koloniyada yattı. Yanvarniñ 22-nde apis cezasınıñ müddeti yekünlengeninen onı azat ettiler. Aqyardaki «Hizb ut-Tahrir davasınıñ» ekinci mabüsi Nuri Primov da yanvarniñ 22-nde qomşu Rusiyeniñ Mariy El Cumhuriyetindeki Rusiye koloniyasında azatlıqqa çıqtı.
2016 senesi sentâbr ayında Rostov-na-Donu şeeriniñ Şimaliy-Kavkaz okrugınıñ arbiy mahkemesi qararını seslendirip, «Hizb ut-Tahrir davası» boyunca qabaatlanğan aqyarlılar Ferat Sayfullayev, Rustem Vaitov ve Nuri Primovnı beş yıl umumiy rejim koloniyasında qalmalarına üküm etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
