Qırımlı advokat Emil Kurbedinov Moskvağa barıp, tutulğan cenk esiri ukrain deñiz askeri Bogdan Nebılitsanı qorçalamağa planlaştıra. Bu aqta o, 5 kün yatqan nezarethaneden çıqıp ayttı.
Qırım.Aqiqat mühbiriniñ bildirgenine köre, advokat bu cuma künü Moskvada olmağa niyetlene.
Advokat Kurbedinovnı 2013 senesi Facebookta paylaşqanları içün ekstremist teşkilâtlarnıñ işaretleri ya da timsalleriniñ teşviqatı ve açıq numayış etilmesi sebebinden apiske aldılar. Kurbedinovnıñ zenaatdaşları dey ki, onı Dimaşqqa köçken Qırım sakini şikâyet etti.
Dekabrniñ 7-nde Kreml kontrolindeki Aqmescitniñ Kiyev rayon mahkemesi qırımlı advokat Emil Kurbedinovnı 5 künge tevqif etken edi.
Advokatnıñ fikirince, onıñ dekabrniñ 6-nda Rusiye uquq qoruyıcıları tarafından tutulması «olmaycaq sebeplerden» yapıldı, o, ekstremizm qabaatlarını tanımay. Emil Kurbedinov qayd etkenine köre, tutulmasınıñ kerçek sebebi onıñ aq qorçalayıcı faaliyeti, siyasiy mabüslerge köstergen yardımı ve Ukraina askeri Bogdan Nebılitsanı qorçalağanı ola.
Noyabrniñ 28-nde Kreml kontrolindeki Aqmescitniñ Kiyev rayon mahkemesi «Nikopol» kateriniñ komandanı, Aqyardaki Nahimov Arbiy-deñiz quvetleri Akademiyasınıñ sabıq kursantı Bogdan Nebılitsanı 2019 senesi yanvarniñ 25-ne qadar apiske aldı.
Onı FSB ukrain gemilerini Keriç Boğazında zapt etken soñ tutulğan diger 24 ukrain askerinen beraber tevqif ettiler. Aqmescit ve Keriçteki Rusiye mahkemeleri tarafından apiske alınğan Ukraina deñizcilerine 6 yıl apis cezası berilmesi mümkün. Qırım Muhtar Cumhuriyetiniñ prokuraturası Rusiye FSBsi zapt etken deñizcilerni cenk esiri dep tanıdı.
Noyabrniñ 26-nda Ukraina Yuqarı Radası Keriç boğazında Rusiye arbiyleri tarafından Ukraina gemilerine açılğan ateş sebebinden bir qaç vilâyette cenk vaziyetini ilân etti.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
