Apiske alınğan qırımtatar faali Edem Bekirov Aqmescitteki Semaşko hastahanesinde tibbiy teşkerüvden keçti. Bu aqta advokatı İslâm Velilâyev yazdı.
«Bugün Edem ağanı ziyaret ettim. O, cuma künü Semaşko hastahanesine teşkerüvge çıqarılıp, ekdokrinolog ve kardiolog ekimlerine baqıtırlğanını ve yürek ultrases talili yapılğanını bildirdi… Yürek hastalığı ve şeker hastalığı fenalaşa. Nefes tarlığı, «allergik» öksürik raatsızlay, Edem ağa oturıp yuqlay», – dedi advokat.
Velilâyevniñ bildirgenine köre, imaye Bekirovnıñ Aqmescit SİZOsınıñ tibbiy bölüginden hastahanege avuştırıluvı içün er şey yapmağa niyetlene.
Keçenleri Ukraina Yuqarı Radasınıñ insan aqları vekâletlisi Lüdmila Denisova Rusiye zenaatdaşı Tatyana Moskalkovağa qırımtatar faali Edem Bekirovnıñ sağlıq vaziyeti aqqında muracaat yolladı.
Bundan evel Edem Bekirov açlıq tutmağa niyetlengenini bildirdi.
O, tibbiy teşkerüvden soñ insulin iñektsiyalarından allergiya keçirdi.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
