Rusiye uquq qoruyıcıları tarafından «terrorizm propagandasında» qabaatlanğan qırımtatar faali, blogeri Nariman Memedeminovğa martnıñ 14-ne keçirilmesi planlaştırılğan ameliyat yapılmadı, dep tarif etti martnıñ 15-nde advokat Emil Kurbedinov Qırım.Aqiqat muhbirine.
Onıñ aytqanına köre, Memedeminovnı eki aydan berli ağrılar raatsızlay ve acele ameliyat yapılmalı. «Tünevin (martnıñ 14-nde – QA), ameliyat olacaq künü, eki mahkeme oturışuvı belgilendi. Birincisi saba saat 9.30-da oldı, amma biz onı 12-ge qadar bitirdik. Ekincisi – iştirak etmeycegini mahsus yazğan edi. Birinci oturışuvdan soñ onı ameliyatqa alıp keterler, dep tüşüngen edi. Amma, belli olmağan sebeplerden onı çıqarmadılar, ameliyat ise martnıñ soñuna qaldırıldı», – dedi Kurbedinov.
Advokat diagnoznı aytmadı, amma Memedeminov yaqın künlerde acele ameliyatqa muhtac, çünki «onıñ tedaviylenmesi pek sozuldı», dep qayd etti. Kurbedinov muvekkiliniñ «acele ameliyat olması içün bütün qurulışlarğa muracaat etkenini» bildirdi.
Rusiye kontrolindeki Qırım Yuqarı mahkemesi martnıñ 14-nde Nariman Memedeminovnıñ tevqifini eki ayğa uzattı.
Martnıñ 22-nde Bağçasaray rayonında Rusiye telükesizlik hadimleri ve uquq qoruyıcıları Nariman Memedeminovnıñ evini tinttiler. Ondan soñ faaliyetçi Aqmescitteki Rusiye FSBsi idaresine alıp ketildi. Martnıñ 23-nde mahkeme Memedeminovnı tevqif etti.
Memedeminovnı Rusiye CK-nıñ 205 maddesiniñ 2-nci qısmına ait olğan cinayette (İnternet vastasınen terrosistik areketlerge açıq çağıruvlar) qabaatlaylar.
Martnıñ 23-nde QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.
