Mayısnıñ 16-nda Kreml kontrolindeki Qırım Yuqarı mahkemesi Rusiye quvetçileri tarafından tutulğan qırımtatarı, Bağçasaray sakini Memet Belâlovğa qorantasınen körüşmege kene izin bermedi. Bu aqta «Qırım birdemligi» cemaat birleşmesi Facebookta haber ete.
«Qadı advokatnıñ şikâyet arizasını red etip, qoranta ile körüşüvge izin bermemek qararını deñiştirmedi», – dep aytıla haberde.
Oturışuvda Memet Belâlov bir buçuq yıl devamında tahqiqat aselet sozulğanını aytıp, qorantasınen körüşmek yasağını «olmaycaq şey» dep adlandırdı.
«O, oña ve «Hizb ut-Tahrir davası» boyunca diger qabaatlanğanlarğa qarşı cinaiy davanı halqara normalarğa köre qanunsız sayıp, qabaatını inkâr ete», – dep aytıla haberde.
2017 senesi oktâbrniñ 12-nde Rusiye telükesizlik hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
