Advokat Rifat Yahin Aqmescitteki «Hizb ut-Tahrir davasınıñ» mabüsi Cemil Gafarovnıñ saqatlığı olğan şahıs statusını er yıl olğanı kibi tasdıqlamaq içün arizasını Rusiye Emek ve içtimaiy qoruv nazirliginiñ tibbiy-içtimaiy ekspertiza bürosına berdi. Bu aqta o, «Qırım birdemligine» haber etti.
Advokatnıñ aytqanına köre, Cemil Gafarovnıñ ekinci derece saqatlığı aqımdaki sene fevral ayında tibbiy-içtimaiy ekspertiza bürosında tekrar baqılğan soñ tasdıqlandı. Bu tibbiy komissiya imayeciniñ Rusiye Cezalarnı yerine ketirüv federal hızmetiniñ 91-inci tibbiy bölügine qarşı açtırğan memuriy davadan soñ teşkil etildi, faqat saqatlıq statusı 2020 senesi noyabr ayına qadar yapıldı.
«Bugün Gafarov tahqiqat izolâtorı vastasınen ve menim mektübimnen tibbiy-içtimaiy ekspertiza bürosına azırlağan arizamnı imzaladı. Bu ariza Qırım Cumhuriyeti tahqiqat izolâtorınıñ yazıhanesine berildi», – dep tarif etti Gafarovnıñ imayecisi.
Yahinniñ aytqanına köre, Gafarovnıñ ekimlerge baqtırıluvınen bağlı arizalar yaznıñ başından berdi siyasiy mabüs tarafından advokatsız da berilgen edi.
Advokat Lilâ Gemeci bildirgenine köre, Aqmescitteki ekinci «Hizb ut-Tahrir davasınıñ» mabüsi Cemil Gafarov sağlıq vaziyetini şikâyet ete.
Qırım ve Aqyardaki Rusiye Cezalarnı yerine ketirüv federal hızmetiniñ idaresi ekim Gafarovnıñ sağlıq vaziyetini taqip ete, dep bildirgen edi.
Daa evel Gafarovnıñ advokatı Rifat Yahin müvekkiliniñ alı kritik oldı, dep qayd etken edi. Cemil Gafarov üçünci derece saqatı, büyrekleri hasta ve yürek hastalıqları bar. Advokat Gafarovğa ilâc bermeyip, hastahanege avuştırmağa razı olmadılar, dep qoştı. Advokat, müvekkiliniñ tibbiy tedqiqlerine dair arizanı Aqmescit SİZOsınıñ memuriyetine berdi.
«Memorial» Rusiye aq qorçalayıcı merkezi Cemil Gafarovnı siyasiy mabüs dep tanıdı.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen 24 faal Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Edem Yayaçikov – ğayıp oldı, onıñ bulunğan yeri martnıñ 27-nden berli belli degil. Soñra daa bir şübheli Raim Ayvazov tutuldı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
