Qırımtatar faali Edem Bekirovnıñ advokatları onı apisten çıqarmaq içün Avropa insan aqları mahkemesine muracaat etmege niyetlene. Bu aqta advokat İslâm Velilâyev Qırım.Aqiqatqa bildirdi.
«Soy-sopları ketirgen vesiqalar esasında ekimlerge muracaat ettik, ekimlerden alı ağır olğanını isbatlaycaq vesiqa almaq kerekmiz, bu hastalıqlarınen SİZOda bulunması mümkün degil. Avropa mahkemesine 39-ıncı madde (ilk tedbirler – QA) boyunca muracaat etip, vaziyetke tesir etmege rica etecekmiz, Avropa mahkemesi acele qarar ala bile. Mesele şu ki, aqibetler ağır ola bile. Bunı şimdi yapmasaq, o, öle bile», – dedi advokat.
Kreml kontrolindeki Aqmescitniñ Kiyev rayon mahkemesi dekabrniñ 13-nde qırımtatar faali Edem Bekirovnı eki ayğa apiske aldı. O, 2019 senesi fevralniñ 11-ne qadar apiste qalacaq. Ukraina Tış işler nazirligi mahkeme qararına qarşı «sert narazılıq» bildirdi.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
Herson vilâyetindeki Novoalekseyevka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutuldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler.
