Apiske alınğan qırımtatar vatandaş jurnalisti ve faali Nariman Memedeminov mayısnıñ 7-nde Rusiye Qırım Yuqarı mahkemesiniñ oturışuvına elnen yazılğan yazuvlı şiarlarını alıp ketirdi. O, «Biz – Qırım birdemligimiz» fleşmobına qoltuttı, dep bildire Qırım.Aqiqat mühbiri.
«Advokat Edem Semedlâyev maña «Biz – Qırım birdemligimiz» fleşmobı aqqında tarif etti, mında olsam da, martnıñ 27-nde apiske alınğanlarğa qoltutmağa qarar berdim», – dedi Memedeminov mahkemede.
O, «Qırımtatarlarsız Qırımmı?», «Yañı qabaatlar – yañı yalan», «18.05.1944 – satqınlar – sürgünlik. 2014 senesi – bugün – ekstremist ve terroristler – baa ne olacaq?» kâğıtlarını da köterdi.
Oturışuvda Memedeminov qafeste tutulğanına esaslanıp, prokurornı çetleştirmege rica etti: «Bu «quşhanede» bulunğanım aqlarımnı boza, dep tüşünem. Advokatlarnıñ yanında olıp, eñ azında yazma masasını qullanmağa ister edim».
Mahkeme muracaatını qanaatlendirmedi, oturışuv devam ete, dep bildire Qırım.Aqiqat mühbiri.
Mayısnıñ 7-nde Kreml kontrolindeki Qırım Yuqarı mahkemesi Nariman Memedeminovnıñ sıñırlav tedbirini 2019 senesi iyünniñ 15-ne qadar uzattı.
Salı künü, mayısnıñ 7-nde, Nariman Memedeminov 36 yaşını toldurdı.
2018 senesi martnıñ 22-nde Bağçasaray rayonında Rusiye telükesizlik hadimleri ve uquq qoruyıcıları Nariman Memedeminovnıñ evini tinttiler. Ondan soñ faaliyetçi Aqmescitteki Rusiye FSBsi idaresine alıp ketildi. Martnıñ 23-nde mahkeme Memedeminovnı tevqif etti.
Memedeminovnı Rusiye CK-nıñ 205 maddesiniñ 2-nci qısmına ait olğan cinayette (İnternet vastasınen terrosistik areketlerge açıq çağıruvlar) qabaatlaylar.
Martnıñ 23-nde QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.
