Avgust ayında ekinci sanlı Aqmescit SİZO-sından etap etilgen jjemaat jurnalisti Amet Suleymanovnıñ soy-sopu onıñ bulunğan yerini alâ daa bilmeyler. Bunı "Qırım birdemligi" cemaat birleşmesi haber.
Advokat Lilâ Gemeciniñ sözlerine köre, sentâbrniñ 27-nde Rusiye kontrolindeki Aqmescitniñ Jeleznodorojnıy rayon mahkemesi siyasiy mabüs, vatandaş jurnalisti, qırımlı Amet Suleymanovnıñ sağlıq vaziyeti sebebinden ceza çekmesinden azat etüv muracaatı baqılmaq kerek edi. Amma adliyeciniñ haber etkeni kibi oña mahkeme oturışına qoşulmağan.
Rusiye Ceza icrası federal hızmeti siyasiy mabüsni Vladimirge yolladılar, dep haber etken edi, amma ne vaqıt anda kelip çıqacağı belli degil.
"Ne vaqıt nevbetteki mahkeme oturışı olacağı da belli degil. Prokuror davanıñ baqıluvı Suleymanıñ bulunğan yerine Vladimirge berilmek kerek dep ayttı. Mahkemeci de buña razı oldı", - dep yazıla bildirmede.
Avgustnıñ 30-nda ZMINA İnsan aqları merkezi bildirgenine köre, Rusiye mahküm etken vatandaş jurnalisti Amet Suleymanov Qırımdan Rusiyeniñ Vladimir şeerindeki «T-2 Vladimir tsentralı» apishanesine etap etilecek.
2021 senesi Rusiye mahkemesi Amet Suleymanovnı «Hizb ut-Tahrir davası» boyunca 12 yılğa üküm etti.
Suleymanov sağlıq vaziyeti sebebinden 3 yıl ev apsinde edi. Jurnalistniñ yürekniñ arteriya ve mitral yetmemezligi bar, yürek klapanı acele deñiştirilmeli.
Bu yıl aprelniñ 6-nda Amet Suleymanov apiske alınıp, izolâtorğa qapatıldı. Advokat Emil Kurbedinovnıñ malümatına köre, Suleymanovnıñ baş ve yürek ağrıları ola.
«Memorial» aq qorçalayıcı merkezi Amet Suleymanovnı siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
