Rusiyeniñ Ukrayinağa büyük istilâsı başlanğan soñ Keriçteki 2-nci nomeralı tüzetüv cezahanesiniñ hadimleri Vladislav Yesipenkonıñ areket tarzına ve sözlerine diqqatnen baqa. Bunı ömür arqadaşı Yekaterina Kreml siyasiy mabüsleriniñ aqrabalarınıñ birleşmesine bildirdi.
"Şimdi Vladislav ile alâqa yalıñız bir taraflıdır. O, ayda bir kereden çoq telefon etmey. Advokatı ile körüşüvler advokat gizliligini bozğan cezahane teftişçisiniñ iştiragi ile keçe. 2022 senesi martnıñ 4-ü tarihlı sahtekârlıq aqqında Rusiye qanunı sebebinden advokat ve men Vladislav ile laf etkende cenkke cenk dememege ve zaten bu mevzunı muzakere etmemege tırışamız. Çünki er bir yañlış söz, laf sebebinden aqayım daa sert baquv şaraitke oğray bile ya da daa beteri oña qarşı cinayet davası açıla bile", - dedi Yekaterina Yesipenko.
Onıñ sözlerine köre, aqayı ile yapqan qonuşmaları apishane bağından keçe ve cezahaneniñ müdiriyeti tarafından diñlenile eken. Bundan ğayrı jurnalist, diger mabüsler onı taqip etkenini farq ete.
"Aqayım, cezahaneniñ müdiriyeti aman-aman er afta onı özüne çağırıp, maña ve advokatqa artqaç bir şey atmaması mevzusında tenbilegenini dey. Olar bizim ombudsmanğa, uquq qoruyıcılarğa muracaat etecegimizden qorqalar", - dep qoştı o.
Rusiyeniñ nezaretinde olğan Aqmescit rayon mahkemesi Qırım.Aqiqat frilanseri (Azatlıq Raziosınıñ leyhası) Vladislav Yesipenkoğa üküm çıqardı. Rusiyeli mahkemeci Dlâver Berberov jurnalistni 6 yıl sert apis cezasına ve 110 biñ para cezasına mahküm etti. Evel qabaatlav tarafı Yesipenko içün 11 yıl apis cezasını istegen edi.
Avgustnıñ 18-nde Rusiyeniñ nezaretinde olğan Qırımnıñ Yuqarı mahkemesi Vladislav Yesipenkonıñ ükmüni deñiştirdi. Rusiye mahkemesi Yesipnkonıñ ükmüni yımşattı ve 6 yıl yerine onı 5 yıl apis ve 110 biñ para cezasına mahküm etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
