Rusiye kontrolindeki Qırım mahkemeleriniñ ükümleri sebebinden bugünde-bugün yüzden çoq bala babasız qaldı. Bazıları babasını mektepteki tedbirde körip olamaycaq, babaları merasimge kelmeycek, qızına toy künü qoltutmaycaq, baba sport yarışlarında ğalip çıqqan oğlunı quçaqlap olamaycaq. Bu balalardan bazıları babalarını doğğanından berli körmedi. Olarnıñ babaları mabüs ola, aq qorçalayıcılar olarnı siyasiy mabüs olaraq tanıy.
Ana qorantanı birleştire, balalarını baqa, ev işlerinen oğraşa. Şimdi ana küreşçi de oldı. Adalet, sevimli insanı, raatlıq ve yarından emin olmaq içün küreşe.
Qırım.Aqiqat, Qırımdaki siyasiy dava mabüsleriniñ ömür arqadaşlarınıñ ikâyelerini derc ete. Bu maqalede Lutfiye Zudiyeva aqqında aytılacaq (Mümine Saliyevanıñ ikâyesini mında, Liana Cemadnovanıñ ikâyesini mında, Sevil Ömerovanıñ ikâyesini ise mında oquñız).
«Quvetçiler er vaqıt kele bile»
O, terbiyeci olmağa arz etken edi – balalarğa ders berip inkişaf ettirecek edi. Lutfiye Zudiyeva – filolog, ukrain tili ocası, bala tapqan soñ kiçkenelernen çalışmağa istegenini añladı.
«Balalarnı yeşil fidançıqlarğa oşatam, olarnı vaqtında yöneltmek, olarğa inkişaf etmege yardım etmek ve bazı vaqıtları ilham bermek pek müim. Olarnen beraber özüni de çeşit saalarda baqmaq, er taraflama inkişaf etmege mümkün», – dep ayta aq qorçalayıcı, «Qırım birdemliginiñ» qadın faali Lutfiye Zudiyeva.
O, dört yıl evelsi «Elif» bala inkişaf merkezini açtı. Amma açılıştan üç ay keçken soñ bala merkezini teşkermege kelgenler, soñra prokuratura ve FSB tintkenler. Lutfiyeniñ fikirince, sebep – onıñ faaliyeti.
«Bugün musulmanlarnı ve qırımtatarlarnı yañlış tanığan ealiden şikâyetler de ola bile. Ekinciden, bunı cemaat faaliyetimnen bağlayım», – dep ayta qadın.
Bugünde-bugün Lutfiye Zudiyevanı mahkeme ögünde, «Qırım birdemligi» cemaat birleşmesiniñ aktsiya ve toplaşuvlarında sıq-sıq körmek mümkün. O, cep telefonını qaldırmay, er vaqıt bağda qala – semetdeşlerine yardım ete.
2018 senesi Lutfiye mahkemede cemaat imayecisi olğan edi: onlarnen qırımtatarı bir kişilik narazılıqlar içün bütün Qırımda mahkeme etilgende advokatlar yetmegen edi. İnsanlar semetdeşlerini qorçalamaq içün narazılıq aktsiyalarına çıqqan edi.
Bundan bir yıl ögüne Lutfiyeniñ hasta babası tutulğan, evi tintilgen edi. Şimdi er üçünci qırımtatar qorantası siyasiy basqığa oğray, dep qayd ete Lutfiye.
Baarde Lutfiye özü de tutulğan edi. Rusiye quvetçileriniñ aytqanına köre, Facebook ağınıñ qullanıcılarından biri yasaqlanğan Hizb ut-Tahrir timsalleri olğan paylaşuvda onı qayd etti. Bu daa 2013 senesi olğan edi. Lutfiye, Ekstremizm ile küreş merkezinde onı aldatmağa tırıştılar, dep ayta.
«Mında maneviy basqı bar, quvet qurulışlarınıñ vekillerinen özü qalasıñ. O künü bizni aldattılar: Emil Kurbedinovğa ve Lilâ Gemecige (qırımlı advokat ve adliyeci – QA) Merkezde kimse yoq, dep aytıldı, bizge ise advokatlar kelmedi, degenler», – dep hatırlay aq qorçalayıcı.
Lutfiye mahkeme etilgende esnas on eki saattan çoq devam etti. Sıcaqta, oraza vaqtında, semetdeşleri Lutfiyeni mahkeme binası ögünde sabırnen bekledi. Olar mahkeme bitkence qaranlıqqa qadar turdı. Mahkeme oña eki biñ ruble (tahminen 30 dollar) para cezasını berdi.
Lutfiye, insanlar imanlı adam, em qadın aq qorçalayıcı faaliyetinen nasıl oğraşqanını, cemaat faali olğanını añlamay, dep ayta.
«Şimdi Qırımdaki insanlar içün bir vazife bar – adaletsizliknen küreş, olğan repressiv areketlerni toqtatmaq ıntıluvı. O, em erkeklerni, em qadınlarnı, em esli-başlı insanlarnı, em gençlerni, millet mensüpligine baqmadan, insanlarnı birleştirdi. Kütken dinlerine baqmadan birleştirdi», – dep ayta Lutfiye.
Aq qorçalayıcı, «Qırım birdemliginiñ» qadın faali qorantasını da baqmağa yetirştire – Lutfiyeniñ dört balası, qoltutqan ve yardım etken sevimli aqayı bar.
Lutfiyeniñ fikirince, faal qırımlılar şimdi añlay: Rusiye quvetçileri olarnı şimdi er vaqıt kelip tuta bile.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
