"Antıtela" ukrayin taqımı işğal etilgen Qırımda kontsertini ilân ettiler. Bunıñ aqqında olarnıñ instagram saifesinde yazıla.
Artistler 2024 senesi avgustnıñ 23 künü Yaltada "Avangard" stadionında keçirilecek ilk büyük stadion şousı içün biletlerniñ evelden satıluvını açtılar.
"Rusiye istilâsınıñ ilk kününden itibaren elimizge silâ alıp ve cebede bulunıp Ukrayinanıñ ğalebesinden asla şübelenmedik. Bir kün kelecegine ve Ukrayina Qırım çölleri, Ayuv Dağ, Fiolent burnu, Ceneviz Qalesi ve Qarılğaç yuvası üzerinde nezaretni keri qaytaracağına inandıq. Ve mıtlaqa epimiz sevgenlerimiz, balalarımız ve dostlarım ile anda baracaqmız", - dep yazıla bildirmede.
"Antıtela" taqımı 2024 senesi yazında bütün ukrayinlerniñ işğalden azat etilgen Yaltada toplana ve Qırımnıñ cenübiy yalısını zemaneviy ukrayin muzıkası ile yaraştıra bileceklerine eminligini bildirdi.
Soñki aftalar Ukrayinanıñ qaşı ücümi ile bağlı daa çoq bildirmeler berile. Onıñ tarihı ve yeri aqqında iç bir şey belli degil. Bazıları Ukrayina ordusınıñ nişanı Donbas, bazıları ise işğal etilgen Qırım olacaq deyler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
