Türkiyeniñ paytahtı Ankarada Qırımtatar Yaşlıq Qurultayı keçirilmekte. Qırım.Aqiqat mühbiriniñ bildirgenine köre, kongress açılışında Ukrainanıñ Türkiye elçisi Andriy Sıbiğa iştirak etti.
Qırımtatar Medeniyet ve Yardımlaşma derneginiñ vekili Fethi Kurtiy Şahinniñ Qırım.Aqiqatqa tarif etkenine köre, kongress çerçivesinde Qırım ve qırımtatar kütleviy haber vastalarınıñ inkişafı içün berilgen leyhalar üzerinde iş, qırımtatar tilini ögrenmek içün online platformaları ve ögrenüv aletleriniñ meydanğa ketirilüvi, cenkten evelki Qırım toponimleriniñ saqlap qaluvı ve kitaplarnıñ bastırılması muzakere etilecek.
Tedbirde Ukraina, hususan Qırım, Romaniya, Bulğaristan, Litvaniya, Poloniya, Türkiye ve diger memleketlerden 100-den ziyade qırımtatar gençi iştirak ete.
Tünevin Qırımtatar Yaşlıq Qurultayınıñ iştirakçileri Türkiye ükümeti tarafından teşkil etilgen qırımtatar sürgünliginiñ 75-inci yılına bağışlanğan resmiy añma tedbirini ziyaret etti.
Kongressni Qırımtatar Medeniyet ve Yardımlaşma dernegi Yurtdışı Türkler ve Akraba Topluluklar Başkanlığınıñ desteginen keçirmekte.
8-inci Qırımtatar Yaşlıq Qurultayı Ankarada 2016 senesi toplaşqan edi. O vaqıt 150 iştirakçi bar edi.
