Ankarada kimligi belli olmağan insan Beyazrusiye Cumhuriyetiniñ Türkiye elçihanesiniñ mesleatçısı Aleksandr Poganşevge bir qaç kere ateş açtı, dep haber ete Hürriyet.
Diplomat ağır alda hastahanege alındı, dep bildire «Nastoyaşçeye vremâ».
Beyazrusiye Tış işler nazirligi bu malümatnı TUT.BY portalına tasdıqladı. Nazirlikniñ resmiy vekili Anatoliy Glaznıñ malümatına köre, elçihane hadimine «aqlı yerinde olmağan eski arbiy» ateş açtı.
Diplomatqa ücüm etken soñ er adam özüni öldürdi.
2016 senesi dekabr ayında Ankarada sergi açılışında Rusiyeniñ Türkiye elçisi Andrey Karlov atıp öldürilgen edi. Qatil 11 kere ateş açtı, doquz qurşun elçige ketti. Daa soñra belli olğanı kibi, Rusiye diplomatına 22 yaşında türk politsiya hadimi Mevlüt Mert Altıntaş ateş etti. Ücüm neticesinde daa eki insan yaralandı, qatil ise Türkiye mahsus hızmetleri tarafından öldürildi.
