Türkiye Tış işler nazirligi Qırım yalısında MAESTRO ve CANDY tankerlerinde yüz bergen patlav ve yanğında memleketniñ dört vatandaşı elâk olğanını tasdıqladı. Nazirlikniñ saytında haber etilgenine köre, elâk olğanlar eki tankerniñ ekipaj azaları edi.
Türkiye Tış işler nazirliginiñ qayd etkenine köre, 16 Türkiye vatandaşından 8-i qurtarıldı, daa dördü qıdırıla.
Nazirlik vatandaşlarğa, elâk olğanlarnıñ qorantalarına taziyeler bildirip, elâk olğanlarnıñ cesedlerini Türkiyege ketirmek içün «çalışmağa devam etkenini» bildirdi.
Yanvarniñ 21-nde Qırım yalısında Tanzaniya bayrağı altında «Maestro» ve «Kandi» tankerlerinde patlav ve yanğın oldı.
«Maestro» tankeri Rusiyeniñ Temrük şeerine kete edi, anda 14 Türkiye ve İndistan vatandaşı bar edi. «Kandi» tankerinde 17 insan bar edi – olap da Türkiye ve İndistan vatandaşları. Ukrainalı jurnalist Andriy Klımenkonıñ aytqanına köre, tankerler «ABD Suriye sanktsiya cedvelinde» olğan Milenyum Denizcilik Gemi türk şirketine ait.
Rusiye Tahqiqat komiteti Qırım yalısında yanğın neticesinde tankerlerde insanlarnıñ elâk olğanı sebebinden «diqqatsızlıqtan sebep eki ve daa ziyade şahısnı öldürüv» maddesi boyunca cinaiy iş açtı.
Haber etilgenine köre, 10 insan elâk oldı, daa 12-si qurtarıldı. Yaralanğan deñizciler №1 Keriç şeer hastahanesine alıp ketirildi.
Yanğın ve patlavğa oğrağan tankerler Suriyege qanunsız şekilde şingen gaz taşığan edi, dep bildirdi Ukrainanıñ vaqtınca işğal etilgen topraqlar meseleleri nazirligi.
2014 senesi iyül ayında Ukraina ükümeti Rusiye işğal etken yarımadanıñ bütün limanlarını resmiy şekilde qapattı, Qırım limanları halqara gemiler içün qapalı qala.
