Türkiye Ukraina topraq bütünligi ve sıñırlarına qoltutıp, qırımtatarlarnı qorçalaycaq. Bu aqta Türkiye Tış işler naziri Mevlüt Çavuşoğlu Ukraina Tış işler naziri Pavlo Klimkin ile beraber Odesada keçirgen matbuat konferentsiyasında bildirdi.
«Fursattan faydalanıp, daa bir kere qayd etmege isteyim ki, Ukrainanıñ topraq bütünligi ve sıñırlarınıñ deñişmemesine qoltutamız. Qırım işğalini takbih etip, onı iç bir vaqıt tanımaycaqmız. Bugün bizler qırımtatarlarnıñ aqlarını qorçalamağa niyetlengenimizni daa bir kere qayd ettik», – dep bildire Çavuşoğlunıñ aytqanlarını «Ukrinform».
Nazir Türkiyeniñ Donbastaki cenkke nasıl baqqanını hatırlattı.
«Donbastaki vaziyetniñ barışıq yollarınen al etilmesine qoltutamız ve OSCE vaqtınca monitoring missiyasınıñ faaliyetine qoltutmağa devam etecekmiz», – dep qayd etti o.
Bundan evel Mevlüt Çavuşoğlu, Ankara Rusiye Rusiye tarafından zapt etilgen ukrainalı askerlerniñ azat etilüvi içün elinden kelgenini yapmağa devam etecek, dep bildirdi.
Bundan evel Türkiye prezidenti Recep Tayyip Erdoğan, Rusiye tarafına azat etilecek ukrainalı siyasiy mabüslerniñ cedvelini bergenini ve bu meseleniñ muvafaqiyetli çezilecegini beklegenini bildirgen edi.
Türkiye prezidenti Recep Tayyip Erdoğan qırımtatarlarnıñ milliy lideri Mustafa Cemilevden «Putin ile laf etilecek» Kremlniñ ukrainalı esirleriniñ cedvelini bermege rica etken edi.
Keçken sene oktâbr ayında Rusiye işğal etken Qırımda mahküm etilgen Qırımtatar Milliy Meclisiniñ reis muavinleri Ahtem Çiygoz ve İlmi Umerov Türkiyege teslim etilgen edi. Resmiy olmağan malümatqa köre, Çiygoz ve Ümerovnıñ teslim etilmesi aqqında Türkiye prezidenti Recep Tayyip Erdoğannıñ Rusiye prezidenti Vladimir Putin ile keçirgen körüşüvinde añlaşılğan edi.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
