Türkiye, zıddiyetlerniñ, şu cümleden Qırım meselesinde, barışıq al etilgenini istey. Bu aqta Türkiye tış işler naziri Mevlüt Çavuşoğlu Tokioda «Türkiyeniñ tış siyaseti ve Yaqın Şarq vaziyeti» mevzusında seminarda bildirdi, dep haber ete «Anadolu». Onıñ aytqanına köre, Türkiyeniñ qomşu memleketlerinde zıddiyetler devam ete.
«Dağlıq Qarabağ, cenüp-öset ve abhaz zıddiyetleri, Qırım ilhaqı, Qıbrız problemi – bu meseleler al etilmeli. Türkiye bu problemlerniñ barışıq al etilgenini istey», – dep bildire Türkiye Tış işler naziriniñ aytqanlarını agentlik.
Türkiye prezidenti Recep Tayyip Erdoğan bildirdi ki, Ankara Rusiye tarafına azat etilecek ukrainalı siyasiy mabüslerniñ cedvelini berip, meseleniñ muvafaqiyetli çezilmesini istey.
Türkiye prezidenti Recep Tayyip Erdoğan qırımtatarlarnıñ milliy lideri Mustafa Cemilevden «Putin ile laf etilecek» Kremlniñ ukrainalı esirleriniñ cedvelini bermege rica etken edi.
Keçken sene oktâbr ayında Rusiye işğal etken Qırımda mahküm etilgen Qırımtatar Milliy Meclisiniñ reis muavinleri Ahtem Çiygoz ve İlmi Ümerov Türkiyege teslim etilgen edi. Resmiy olmağan malümatqa köre, Çiygoz ve Ümerovnıñ teslim etilmesi aqqında Türkiye prezidenti Recep Tayyip Erdoğannıñ Rusiye prezidenti Vladimir Putin ile keçirgen körüşüvinde añlaşqan ekenler.
Aq qorçalayıcılarnıñ malümatına köre, 60-tan ziyade Ukraina vatandaşı Rusiye ve işğal altındaki Qırımda siyasiy sebeplerden azatlıqtan marum etilgen edi. Ukraina Tış işler nazirligi Rusiyege 300 kere narazılıq bildirip, anda tutulğan ukrainalılarnıñ azat etilmesini talap etti.
