Aprelniñ 30-nda Ukrainağa amerikalı oyuncı Angelina Jolie gumanitar missiyanen keldi, dep haber ete «Ukrzaliznıtsânıñ» matbuat hızmeti.
«Angelina Jolie Ukrainağa gumanitar missiyanen kelip, Lviv demiryol vokzalını ziyaret etti, anda Pokrovsktan tahliye treninen kelgen yolcularnı qarşıladı», – dep aytıla haberde.
Bundan evel ağ qullanıcıları belli oyuncınıñ Lviv qavelerinden birine kelgenini muzakere etti.
Angelina Jolie BM eyilik iradesiniñ elçisi ola. Büyük Rusiye istilâsı başlağanından berli o, Ukrainağa ve evlerini terk etmege mecbur olğan ukrainalılarğa qoltuttı. Aynıñ başında o, ukrainalılar tedaviylengen İtaliya hastahanelerinden birinde edi.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
