Qırımda «ukrayınalı diversantlar» davasına istinaden mahküm etilgen Andriy Zahtey Rusiyeden Litvaniyağa yol aldı – andan siyasiy mabüs Ukrayınağa ketecek. Bu aqta «Gratı» haber ete.
Fevral ayında Zahtey koloniyadan azat etildi, lâkin Rusiye akimiyeti oña Ukrayınağa ketmege izin bermeyip, Rostov vilâyetinde Çetel vatandaşlarını vaqtınca tutuv merkezine yerleştirdi.
İyünniñ 13-nde aqşam Ukrayınanıñ Latviya elçihanesiniñ hadimleri Zahteyni Ubilinka sıñır noqtasında qarşılap, Ukrayınağa yol aldı, dep haber etile.
Martnıñ 8-nde Ukrayına Devlet migratsion hızmeti Andriy Zahteyge Ukrayınağa qaytması içün vesiqa bermedi. Ukrayına ve Rusiyeniñ konsullıq bağları olmağanından siyasiy mabüs tek üçünci memleketlerden kete bile. Ömür arqadaşı Oksana Latviyağa muracaat etti – şimdi bu memleketniñ yazma cevabını bekleyler.
Andrey Zahtey 2016 senesi avgust ayında Rusiye FSBsi tarafından tutuldı. Rusiye mahsus hızmeti işğal etilgen Qırımda yarımadada terakt azırlağan «ukrayınalı diversantlar» gruppası tutuldı, dep ilân etken edi. Tutulğanlar başta Moskvanıñ Lefortovo SİZOsında edi, soñra olarnı Qırımğa qaytarğanlar.
Rusiye mahsus hızmetleri bu dava boyunca tutulğan Yevgeniy Panov ve Andrey Zahtey yarımadanıñ turistik ve içtimaiy infrastruktura obyektlerinde terror ücümlerini kerçekleştirmege planlaştırğan edi, dep bildirdi.
Zahtey tahqiqat ile mahkemeden evel añlaşmanı imzaladı. Onı 6 yıl ve 6 ay sert rejimli koloniyada qalmasına üküm etkenler ve 220 biñ ruble (tahminen 105 biñ ğrıvnâ) para cezasını bergenler.
Ukrayına akimiyeti Rusiyeniñ ukrayınalılarğa qarşı qabaatlavını red etip, bu Rusiye mahsus hızmetleriniñ provokatsiyası dep adlandırdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
