Qırımtatar asıllı ukrainalı yırcı Jamala Qırımda open-air kontsertni keçirmek istegen yer aqqında Qırım.Aqiqatqa tarif etti.
«Küçük Özende (Maloreçenskoye) yükseklikte pek güzel yer bar, anda acayip manzara açıla. Anda kilse qurğanlar, amma yaqında pek güzel yer bar. Eskiden anda mayak bar edi, anda yapmaq mümkün edi», – dep ayttı yırcı.
Kyivde avgustnıñ 28-nde Jamalanıñ open-air kontserti keçirildi, yırcı ukrainalı yırcı Dmitriy Şurov («Pianoboy» lideri) ile beraber «Endorfinı» adlı yañı yırnı taqdim etti.
Jamalanıñ qayd etkenine köre, koronavirus pandemiyası ile bağlı sıñırlavlardan eñ çoq artistler zarar körecek.
Onıñ fikirince, online rejimde kontsert artistlerge canlı kontsertler vaqtında insanlarnen olğan bağını berip olamaz. Qıyınlıqlarğa baqmadan, Jamala karantin vaqtında taqımından kimseni işten boşatmadı, dep bildire.
