Rusiye prezidenti Vladimir Putin tünevin Qazanda Devlet keñeşi prezidiumınıñ keniş toplaşuvında Tataristan yolbaşçısı Rustam Minnihanovnı eki kere tenbiledi. Bu aqta Radio Svobodanıñ rus bürosı haber ete.
Birinci kere Putin Minnihanovnı «Mesken ve şeer müiti» milliy leyhasınıñ yerine ketirilüv meseleleri boyunca cemaat vekilleri ile körüşüvde diqqatlı olmağanında yüzledi.
Suallerden birine cevap berip, Putin şu daqqada salondaki qomşulardan birinen laf etken Minnihanovğa hitap etti. Prezident adını aytıp hitap etti, amma o, birden eşitmedi. «Anda-mında baqma, ne ola. Bizni diñlemey», – dedi Putin. O, cumhuriyet yolbaşçısı sualniñ başını eşitmedi ve cevap bermeycek, dep ayttı.
Ekinci kere Rusiye prezidenti, Devlet keñeşiniñ işçi gruppa reberi Minnihanovğa söz berdi. Faqat Minnihanov mikrofonğa ketkende onı körmedi. «Çıqıp ketti bir yerge. Qayda ketti?», – dep soradı Rusiye prezidenti.
Putinniñ matbuat kâtibi Dmitriy Peskov, Vladimir Putin tarafından Tataristan yolbaşçısı Rustam Minnihanovğa yapılğan «şaqalar» «devlet yolbaşçısınıñ bu region reberine eyi munasebette olğanını» köstere ve iç bir problem yoq, dep bildirdi.
Minnihanov 2010 senesi martnıñ 25-nden berli Tataristan Cumhuriyetiniñ prezidenti ola.
