İşğal altındaki Qırım ve Aqyarda Rusiye anayasasınıñ tüzetüvlerinen bağlı rey berüvni teşkil etken Rusiyeni siyasiy ve uquqiy aqibetler bekley, dep bildirdi Ukraina Tış işler naziriniñ muavini Vasıl Bodnar iyünniñ 29-nda derc etilgen «İnterfaks-Ukraina» intervyüsında.
«İşğal etilgen ukrain Qırımında rey berüvniñ teşkil etilüvi, qanunsız berilgen Rusiye pasportlarınıñ saipleri olğan şahıslarnıñ iştiraki Rusiye içün siyasiy ve uquqiy aqibetlerniñ sebebi olacaq. Halqara toplulıqnıñ Rusiyeniñ işğal altındaki topraqlarda keçirilgen rey berüv neticelerini takbih etecek siyasiy beyanatlardan sanktsion ve siyasiy basqınıñ quvetleştirilüvine qadar keniş aletleri bar. Putinniñ akimiyette bulunuv müddetiniñ uzatıluvı – Rusiyeniñ istilâiy siyasetiniñ devamı, em cemiyetimiz, em dünya bunı añlamaq kerekler», – dedi o.
Diplomatnıñ aytqanına köre, Ukrainanıñ Rusiyege qarşı sanktsiyalarnı quvetleştire bilecek hususan Avropa Birligi memleketleri arasında ortaqları çoq.
Rusiye tarafı Ukraina naziri muavininiñ aytqanlarına daa cevap bermedi.
İyünniñ 25-nde Rusiyede ve işğali altındaki Qırımda Rusiye Anayasasınıñ tüzetüvlerine rey berüv başlandı. O, iyülniñ 1-ne qadar devam etecek. Tüzetüvlerden biri prezident yıllarını «sıfırlap», Rusiye prezidenti Vladimir Putinge daa eki saylavda namzetini köstermege ve 2036 senesine qadar akimiyette qalmağa imkân berecektir.
Qırımda insanlarnı çeşit yollarnen rey bermege çağıralar. Yarımadanıñ Rusiye akimiyeti köy sakinleri Rusiye Anayasasınıñ tüzetüvlerine rey bersin dep bara. İlânlar Qırım köylerinde asılğan.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
