Qırımtatar Milliy Meclisiniñ azası Eskender Bariyev 1 yıl ve 7 ay evelsi ğayıp olğan Anatoliy Kobzar sağ ve al-azırda Aqyarda apiste tutula, dep bildirdi. Bu aqta Qırımtatar resurs merkezi haber ete.
Bariyevniñ haber etkenine köre, işğal etilgen Qırımda FSB Ukrayina vatandaşı Anatoliy Kobzarnı Rusiye Federatsiyası Ceza kodeksine köre «devlet hainliginde» qabaatlay.
«Anatoliyniñ ğayıp olğanını 2025 senesi fevral ayında eşittim, tuvğanları Qırımtatar resurs merkezine yaqın insannı qıdırğanda yardım içün muracaat etken edi», – dep qayd etti QRM idare reisi Bariyev.
Bariyevniñ bildirgenine köre, onlarnen haber, Qırımnıñ sahte uquq qoruyıcı organlarına mektüpler ve QRM advokat kampaniyası netice kösterdi: Qırımda FSB Anatoliy Kobzarnı 2024 senesi martnıñ 5-nde qanunsız bir şekilde tuttı, mahsus bloklarda tuttı, soñra ise Qırımnıñ SİZOsında saqladı.
Rusiye akimiyeti Kobzar Qırımda ve Aqyarda ava mudafaa yerleriniñ fotoresimlerini yapıp, olarnı Ukrayina istihbaratına yollağan edi, dep qabaatlay.
«1 yıl ve 7 ay devamında tuvğanları Anatoliyden bir haber alamağan edi. Erkek mahsus bloklarda bulundı, soñra ise Qırımnıñ SİZOsında saqlandı. Tek şimdi Aqyar şeeriniñ işğalci Lenin mahkemesi 45 yaşında Anatoliyni eki ayğa apiske almağa qarar berdi», – dep qayd etti Eskender Bariyev.
Rusiye resmiy akimiyeti vaziyetni şimdilik izaatlamadı.
