Rusiyeniñ Krasnodar ülkesiniñ Qara deñiz yalısında eki cermay tankeriniñ batmasından soñ mazut tökülmesiniñ neticelerini yoq etüv işleri devam ete. Regional sağlıq nazirligi 146 göñülli mazutnıñ zeerli tesiri sebebinden özüni yaramay duyğanından şikâyet etkenini ve tibbiy yardımğa muhtac olğanını bildirdi.
Rusiye Federatsiyası Krasnodar ülkesiniñ sağlıq naziri Yevgeniy Filippovnıñ aytqanına köre, dekabrniñ 18-nden başlap, mazutnı temizlevde iştirak etken 146 adam tibbiy yardım istedi, olardan 142-si yardım aldı, üçü hastahanede qaldı – endi çıqarılğan. Zarar körgen daa bir insan aqqında memur aytmay, 17 yaşında tehnikum studentiniñ ölümini gizlemekmi isteyler ya da başqa biri aqqında laf kete – belli degil.
Zarar körgenler arasında Anapadan kelgen göñülli Alisa Şülts de bar, dep haber ete regional 93.ru neşiri. O, internette tarqalğan video sayesinde belli oldı, anda qurtarılğan aqquş qıznı «quçaqlay», başını omzına qoya. Şülts mazut zeerlenüvinden tedaviylenmek içün tamçılıq ala, dep bildirdi.
Devlet Dumasında mazutnıñ Qara deñizge tökülmesiniñ neticeleri muzakereleri Ekologiya, tabiiy resurslar ve etraf müitini qorçalav komitetiniñ toplaşuvınıñ kün tertibinden çıqarıldı. «Deliller olğan soñ bunı muzakere etecekmiz», – dedi komitetniñ başı Dmitriy Kobılkin. Bu aqta «Ekologiya» milliy leyhasınıñ resmiy saytında haber etile.
Regionnıñ operativ ştabı Anapanıñ yalı boyunda yañı mazut tökülüvi bar, dep bildirdi, amma oña «müim degil» dep ayttı – müessise büyükligi aqqında bir malümat bermey.
Tankerler batqanı içün cermay töküldi. Rusiye kütleviy haber vastalarınıñ malümatına köre, «Volgoneft-212» 4300 tonna mazut taşıdı. Shot ve Baza «Volgoneft-239» tankerinde de aman-aman aynı kölemde mazut bar edi.
Anapada eki tanker batqan soñ yalı boyunı mazuttan temizlegen faaller akimiyetten yalı boyunı ğayrıdan tiklemesini ve ekologik felâketniñ neticelerini yoq etmesini talap etti. Olar memleketniñ ükümetine ve Krasnodar ülkesine qarşı dava açtılar. Bir danesi – yerli ve regional memuriyetlerge – endi red etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
