Taras Şevçenko adına Ukrayina milliy mukâfatı komiteti 2027 senesi mukâfatqa namzetlerniñ uzun cedvelini ilân etti. "Dizayn" nominatsiyasında yarışnıñ birinci turuna "Fes" ananeviy Qırımtatar qadın baş kiyimi leyhası ile dizayncı ve tedqiqatçı Liliya Derman kirdi, dep haber ete Qırım.Media.
Eser "Qırımnıñ tamır halqınıñ aqiqiy maddiy mirasını saqlav, ğayrıdan tiklev ve zemaneviy añlavğa" bağışlanğan.
Fes — teren tarihiy ve timsaliy emiyetke saip olğan Qırımtatar qadın ananeviy baş kiyimidir.
Liliya Dermannıñ leyhası müzey nümüneleriniñ teren ögrenilmesini, kerçek azırlama tehnikasınıñ ğayrıdan tiklenilmesini ve Qırımtatar dizaynınıñ unikal elementleriniñ Ukrayinanıñ zemaneviy medeniy alanına integratsiyasını birleştire.
Boşnıñ 9-nda derc etilgen PEN America ve Ukrain PEN-niñ ortaq maruzasında qayd etile ki, 2022 senesi Rusiyeniñ Ukrayinağa keñ kölemi basuvı başlanğan soñ Qırımtatar medeniyetini saqlap qalmaqnen oğraşqan insanlarnıñ taqip etilüvi arttı. Tedqiqatçılarnıñ fikrince, Rusiye akimiyeti mustaqil medeniy ve tasil teşebbüslerine telükesizlik telükesi olaraq baqa.
Maruza müellifleri halqara toplulıqnı Qırımtatar kütleviy haber vastalarına, medeniy leyhalarğa ve tasil teşebbüslerine, şu cümleden Qırımdan tış Qırımtatar diasporasınıñ vekilleri tarafından teşkil etilgenlerine qol tutmağa çağıralar.