Link açıqlığı

Saatnıñ esas haberi

Amnesty International: YouTube, Rusiyeniñ qırımtatar halqına qarşı yapqan repressiyalarında iştirak etmemeli


Apiste tutulğan qırımtatar aq qorçalayıcısı Emir-Üsein Kuku
Apiste tutulğan qırımtatar aq qorçalayıcısı Emir-Üsein Kuku

Amnesty International halqara aq qorçalayıcı teşkilâtı Ukraina temsilciliginiñ müdiri Oksana Pokalçuknıñ bildirgenine köre, YouTube «Rusiyeniñ qanunsız talaplarına uymamalı ve qırımtatar halqına qarşı sert repressiyalarda iştirak etmemeli». Bu aqta o, kütleviy haber vastalarınıñ «Roskomnadzor» YouTubedan qırımtatar aq qorçalayıcısı ve vicdan mabüsi Emir-Üsein Kukunıñ videosını silmesini talap ete kibi malümatını izaatlap dedi.

«Emir-Üsein Kuku – cesür bir aq qorçalayıcı, qırımtatarlarnıñ aqlarını qorçalağanı içün üç yıldan berli apiste tutula. Qorantası Qırımnıñ faktik akimiyeti tarafından qorquzıla ve taqip etile, YouTube Kukunıñ müim işi ve taqip etilgeni aqqında videonı silse, bu olarğa yapılğan daa bir darbe olacaq», – dep bildire Pokalçuknıñ aytqanlarını Amnesty International Ukraina matbuat hızmeti.

Pokalçuknıñ aytqanına köre, Emir-Üsein Kukunıñ Rusiye akimiyeti tarafından taqip etilmesi «Rusiye Qırımnı işğal etip qanunsız ilhaq etkeninden berli söz serbestliginiñ sıñırlanuv timsali ola».

«Akimiyet (Rusiye – QA) farqlı tüşünce şekillerini yoq etip, bir çoq qırımtatar faalini apiske aldı. Şimdi olar aq qorçalayıcı, başqalarnı qorçalağan Emir-Üsein Kuku aqqında malümatnı silecek olalar», – dep aytıla haberde.

Amnesty International Ukraina müdiriniñ qayd etkenine köre, YouTube öz vazifelerini halqara insan aqları standartlarına uyğun bir şekilde yapıp, Rusiye ükümetiniñ tsenzura talaplarına qarşı çıqmalı.

Ukrainanıñ «Tsentr jurnalistskih rassledovaniy» neşiri YouTube uquqiy yardım hızmetiniñ mektüp kopiyasını aydınlattı. Anda videonı silmek talabı mevcut, «Roskomnadzor» videoda «ekstremist faaliyetine çağıruvlar bar», dep bildirdi. Laf qırımtatar aq qorçalayıcısı, şimdi Rusiyede apiste tutulğan Emir-Üsein Kukunıñ videosı aqqında kete.

Ukraina haber siyaseti nazirligi, «Roskomnadzor» talabını izaatlap, Google ve YouTube şirketlerine «Rusiye tarafı YouTube video yerleştirme servisiniñ aletlerini söz serbestligini sıñırlamaq içün qullanmağa tırışa», dep bildirdi.

YouTube uquqiy yardım hızmeti Ukraina haber siyaseti nazirliginiñ beyanatını açıq sürette daa izaatlamağan edi.

XS
SM
MD
LG