Link açıqlığı

Saatnıñ esas haberi

Amnesty International Rusiyede apis etilgen Emir-Üsein Kukuğa mektüp yazmağa çağırta


Amnesty International halqara uquq qoruyıcı teskilât Rusiyede apis etilgen Emir-Üsein Kukuğa mektüp yazmağa çağırta.

Qayd etilgeni kibi, şimdi o Rostov-na-Donu şeeriniñ tahqiqat izolâtorında tutula.

"Destek sözlerinen mektüpler - apislilerniñ tış dünyanen aman-aman yekâne bağ usulıdır. Olar ümütni coymamaq ve dünyada olğanı aqqında haber almaq imkân bere", - sayalar uquq qoruyıcılar.

Onıñ qadını Meryem Kuku aytqanına köre, Emir-Üseinge Latviya ukrainlerinden mektüp kelgen edi, SİZO memuriyeti buña pek şaştı.

"Qırımdan vatandaslardan da mektüp keldi, oña sabır ve küç tilediler, destek sözlerini yazdılar. O bu mektüpni Aqmescitteki soñki mahkemege ketirgen edi. Köstere, közleri ise quvançtan parılday! Bu quvançnı nege oşatmağa da bilmeyim. Amma olar içün bu pek müim olğanını añladım", - dedi Meryem Kuku.

Amnesty International Ukraine saytında Rusiye SİZOlarına mektüp yazuv qaideleri ve adresler bar.

Rostov-na-Donu şeeri Cenübiy okrugınıñ arbiy mahkemesi noyabrniñ 12-nde Yaltadaki «Hizb ut-Tahrir davasınıñ» altı mabüsini koloniyada qalmasına üküm etti. Mahkeme qararına köre, Muslim Aliyev 19 yılğa, İnver Bekirov 18 yılğa, Emir-Usein Kuku 12 yılğa, Vadim Siruk 12 yılğa, Arsen Cepparov 7 yılğa ve Refat Alimov 8 yılğa üküm etildi. Olar sert rejimli koloniyada qalacaqlar.

Rusiyeniñ Amnesty International reisi Aleksandr Artemyev işbu ükümni «siyasiy taqip» dep adlandırdı.

Ukraina Tış işler nazirligi bu üküm sebebinden Rusiyege narazılıq bildirdi.

Bu dava boyunca qabaatlanğanlar 2016 senesi fevral-aprel aylarında Yaltada tutulğan edi. Olarnı Rusiyede yasaqlanğan «Hizb ut-Tahrir» islâm siyasiy teşkilâtına alâqaları bar olğanında qabaatlaylar.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.

«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

XS
SM
MD
LG