Rusiye akimiyeti ukrayinalı arbiy esirlerni ve vatandaş esirlerini işkencege oğrata, tış dünya ile alâqası olmağan uzun müddetli apishanede qaldıra ve insanlıqqa qarşı cinayetler yapqan diger insanlarğa nisbeten deşetli yanaşuvlar yapa, dep bildire bugün Amnesty International aq qorçalayıcı teşkilât öz yañı maruzasında.
Maruzada qayd etilgenine köre, ukrayin arbiy esirleriniñ ve vatandaş esirleriniñ bulunğan yerleri boyunca şeffaflıqnıñ yoqluğı, apiste tutulğanda işkence, diger sert munasebetler ve atta esirlerniñ qanunsız öldürilüvine izin bere.
"Rusiyeniñ ukrayin esirleri ve vatandaşlarını tış dünyadan ayırıp tutqanı, olarnı insaniyetsizleştirmek ve susturmaq maqsadınen yapılğan siyasetini köstere, olarnıñ qorantalarını yaqınları aqqında haberlerni beklep, azap çektire", — dep bildirdi Amnesty International baş kâtibi Annes Kallamar.
Onıñ aytqanına köre, işkence tış dünyadan tam izolâtsiyada keçirile, qurbanlar ise Rusiye apishane hadimleriniñ merametine bağlı.
"Bu bir sıra ayrı adiseler degil, bu halqara uquqnıñ bütün qaidelerini bozğan sistematik bir siyasettir", — dep qoştılar teşkilâtta.
Amnesty International esabatı 2024 senesi qara qış ve boş ayları arasında Ukrayinada 104 insannıñ intervyüsına esaslana. Olarnıñ arasında beş sabıq ukrayin arbiy esiri, 38 arbiy esirniñ qoranta azaları, "hususiy sebeplerden ğayıp olğan 23 ukrayinniñ qoranta azaları", 28 evel tutulğan vatandaş ve olarnıñ qorantaları, em de Ukrayinada tutulğan 10 Rusiye arbiy esiri bar.
Teşkilâtta qayd eteler ki, ukrayinalı esirlerniñ çoqusı tış dünya ile bağsız tutula, qorantaları ise olarnıñ taqdiri, statusı ve bulunğan yeri aqqında malümat alamay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
