Bağçasaraydaki ekinci «Hizb ut-Tahrir davasınıñ» mabüsi, «Qırım birdemligi» cemaat birleşmesiniñ koordinatorlarından biri Server Mustafayev vicdan mahkümi olaraq tanıldı. Bu aqta Amnesty International halqara aq qorçalayıcı teşkilâtınıñ saytında derc etilgen haberde aytıla.
«Birinciden, onıñ esnasını daa tafsilâtlıca közetmek içün belli bir sebep bar. Halqara vekiller bu esnasqa diqqat ayıra. Qabaat tarafınıñ delilleri tek davada iştirak etken advokatlar tarafından talil ettirilmeycek, halqara toplulıq da talil yapacaq. Ve, tabiiy ki, açıq olması – qoruv aletlerinden biridir. Davada olacaq bütün bozuvlar qayd etilip, bir şeyni isbatlaycaq: Qırımdaki qırımtatarlar, musulmanlar – terrorist degil ve olarnı tek faal vatandaş areketleri, diniy ve milliy baqışları içün taqip eteler», – dep izaatladı Amnesty International beyanatını advokat Lilâ Gemeci.
Onıñ fikirince, Server Mustafayevniñ Amnesty International «vicdan mahkümleri» cedveline kirsetilmesi azat etilüvine yardım etecek.
«Artıq bütün halqara körüşüvlerde ve halqara bağlarda Amnesty International vesiqalarını köstere bilemiz. Em de qanunsız taqipke cevap şekillerinden biri ola. Ümüt etem ki, bu status onıñ azat etilmesini, ailesine qavuşmasını ve aq qorçalayıcı faaliyet yoluna qaytmasını yaqınlaştırmağa imkân berecek», – dep qoştı advokat.
Daa evel Bağçasaraydaki ekinci «Hizb ut-Tahrir davasınıñ» eki mabüsi Timur İbragimov ve Server Mustafayev Krasnodar SİZOsında bulunalar, dep haber etilgen edi.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
