Amnesty International halqara aq qorçalayıcı teşkilâtı Rusiye işğal etken Qırımda insan aqları vaziyeti daa beter oldı, dep bildire. Bu aqta Amnesty Internationalnıñ BM tasil, ilim ve medeniyet meseleleri (UNESCO) kâtibiyetindeki maruzasında aytıla, dep haber ete «Ukraina haberleri».
«Rusiye Federatsiyası tarafından yarımadanıñ qanunsız ilhaq etilüvini açıq sürette tenqit etkenlerge qargı basqı ve qorquzuv siyaseti faal sürette keçirile. Bu repressiyalar qırımtatar cemiyetiniñ faalleri ve belli vekilleri, em de Ukrainağa qoltutqan faal ve cemaat erbaplarına qarşı yapıla», – dep aytıla metinde.
Maruzada aytılğanı kibi, insan aqlarına riayet etilüvini nezaret etken halqara közeticiler içün Qırım qapalı olıp qala.
Teşkilât 2016 senesi Rusiye ükümeti tarafından yasaqlanğan Qırımtatar Milliy Meclisiniñ azaları apiske alınğanını ve sürgün etilgenini qayd ete.
Amnesty International «Qırım birdemligi» birleşmesiniñ azalarına qarşı yapılğan repressiv tedbirler, şu cümleden taqip, körüşüvlerniñ bozuluvı ve kimlik teşkerüvlerini qayd ete.
Bundan ğayrı, teşkilât Qırımda musulmanlar taqip etilgenini ve kütleviy haber vastalarında ve internet ağında söz serbestliginiñ bozuluvını örnek kösterdi.
İşğalden soñ Qırımdaki faktik Rusiye akimiyeti mustaqil jurnalistler, cemaat faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
