Amnesty International aq qorçalayıcı teşkilâtı lâqayt qalmağanlarnı Rusiye akimiyeti tarafından Aqmescit SİZOsında tutulğan ve sağlığı fenalaşqan qırımtatar faali Edem Bekirovğa qoltutuv aktsiyasına qoşulmasına çağıra. Bu muracaat teşkilâtnıñ saytında derc etildi.
Aq qorçalayıcılar Qırımdaki Rusiye cezalarnı yerine ketirüv federal hızmeti idaresiniñ yolbaşçısı, general-mayor Vadim Bulgakovnıñ adına Edem Bekirovnı azat etmek talabı ile mektüp yazmağa çağıra.
«Qırımtatarı Edem Bekirov 2018 senesi dekabr ayında Rusiye mahsus hızmetleri tarafından tutulğanından berli Aqmescit SİZOsında buluna. O, saqatlıq arabaçığını qullana, onıñ ciddiy sağlıq problemleri bar, oña SİZOda olmağan tibbiy yardım kerek. Mabüsni mayısnıñ 24-nde ziyaret etken advokatı bildirgenine köre, Edem Bekirovnıñ sağlıq vaziyeti pek fenalaştı ve ayatı telükede qala. Çağıruvnı öz sözlerinen yazıñız ya da örnek mektüpni qullanıñız», – dep aytıla haberde.
Amnesty International qullanılması mümkün olğan örnek mektüpni de derc etti.
Mayısnıñ 28-nde Bekirovnıñ advokatı İslâm Velilâyev müvekkilini Aqmescit SİZOsında ziyaret etip, sağlıq vaziyeti kritik fenalaşqanını bildirdi. Velilâyevniñ aytqanına köre, yürek, baş ağrıları, mide astı bezi problemleri, ayaqlarnıñ üyüşüvi, yüksek qan basımı ve yüksek qan şekerinden ğayrı, boğulmağa ve qannen öksürmege başladı.
Daa evel mayısta qırımtatar faali Edem Bekirov Aqmescitteki Semaşko hastahanesine teşkerüvge çıqarılğan edi.
Aprelniñ 26-nda Rusiye kontrolindeki Qırım Yuqarı mahkemesi Bekirovnıñ imayesi bergen şikâyet arizasını red etti. Edem Bekirov iyünniñ 12-ne qadar SİZOda qalacaq.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
