Advokat Emil Kurbedinov keçende Bağçasaray muvaqqat tutuv izolâtorına ketirilgen Amet Suleymanov ile körüşip olğan. Onıñ sözlerine köre, jurnalistniñ tutma şaraiti normaldir, amma o, daimiy baş ve yürek ağrısını çeke eken. Bunı "Qırım birdemligi" cemaat birleşmesi haber etti.
"Maneviy ceetten özüni pek yahşı is ete – bunıñ daa bir sınav olğanını pek yahşı añlay. Bu ceetten Ametni yeñemezler. Sağlığına kelgende, bu, elbette, qanaatlendirici degil. Suleymanov daimiy baş ve yürek ağrısından aytına. Kamerada bir özüdir. Şarait azmı çoqmı normaldir, avalandıruv donatması bar, tütünli degil dey", - dep aytıp berdi advokat.
Kurbedinov, Suleymanov yaqın künlerde Aqmescit izolâtorına, soñra ise Rusiyedeki apishanelerniñ birine etap etilecegini tüşüne.
"Asılında bu qaçırma ve halqara uquqnı bozmadır", - dep qayd etti o.
Fevralniñ 10-nda Rusiyeniñ Vlasiha İstinaf mahkemesi şikâyetni red etip, vatandaş jurnalisti Amet Suleymanov, Rustem Seytmemetov, Seytumer ve Osman Seytumerov ağa-qardaşına qarşı Rostov-na-Donu Cenübiy bölgeniñ arbiy mahkemesiniñ qararını quvette qaldırdı.
Amet Suleymanov yüreginiñ arterial ve mitral yetersizligini çeke, onıñ yürek klapanınıñ deñiştirilmesi içün acele ameliyatqa ihtiyacı bar.
Mudafaa tarafı, esnas devamında Amet Suleymanovnıñ sağlı vaziyeti sebebinden böyle bir apis tedbirini qullanmaq mümkün olmağanını añlatmaq tırıştı.
Onıñ imayecisi Lilâ Gemeci ükümni öldürici dep saya: "Onı ölümge mahküm ettiler. Böyle diagnoz ile adamnıñ apis etilmesi tsinizmdir".
Rostov-na-Donu Cenübiy okrugınıñ arbiy mahkemesi 2021 senesi oktâbrniñ 29-nda Bağçasaraydaki üçünci «Hizb ut-Tahrir davasınıñ» mabüslerine üküm çıqardı. Mahkeme olarnı «akimiyetni zorbalıq yolunen zapt etüv ıntıluvında» ve «terror teşkilâtında iştirak etüvde» qabaatlı tanıp, mabüslerni sert rejimli koloniyağa almağa qarar berdi. Bu aqta mahkemeden soñ mahküm etilgen qırımlılarnıñ advokatları bildirdi.
Advokat Edem Semedlâyevniñ malümatına köre, Seytumer Seytumerov 17 yıl sert rejimli koloniyada qalmasına, Osman Seytumerov 14 yıl, Amet Suleymanov 12 yıl, Rustem Seytmemetov 13 yılğa üküm etildi. Advokatnıñ bildirgenine köre, mabüsler başta 3 yıl ve 6 ay apishanede yatmalı.
Rostov-na-Donu (Rusiye) Cenübiy okrugınıñ arbiy mahkemesinde Rusiye qabaatlavınıñ vekilleri oktâbrniñ 20-nde Bağçasaraydaki «Hizb ut-Tahrir davasınıñ» dört mabüsi içün 66 yıllıq apis cezasını talap etti.
Hatırlatamız, «Memorial» aq qorçalayıcı merkezi Bağçasaraydaki «Hizb ut-Tahrir davasınıñ» mabüsleri Seytumer Seytumerov, Osman Seytumerov, Amet Suleymanov ve Rustem Seytmemetovnı siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
