Rusiye tarafından mahküm etilgen qırımlı vatandaş jurnalisti Amet Suleymanov «Vladimirskiy tsentral» koloniyasından ömür arqadaşı Lilâ Lümanovağa bir buçuq yıl içinde ilk sefer telefon etip oldı. Bu aqta Lümanova Facebook saifesinde bildirdi.
«Bu qadar uzaqta olğan sevimli adamnıñ telefon etmesi tek quvanç degil, tek Amet içün degil, menim içün de, onıñ içün qayğırğan er bir insan içün müim olğan küçlü bir yardımdır. Biz tek 12 daqqa laf ettik, amma qısqa vaqıt içinde çoq şeyni muzakere ettik. Amet öz sağlığı aqqında ayttı: yüksek qan basımı bar, böyle şaraitlerde ameliyat beklemek pek uzun esnastır», – dep yazdı Lümanova.
O, Suleymanovnıñ Qırımnı sağınğanını da aytıp, «yalanlar ğayıp olacağına, qabaatsızlar azat olacağına» ümüt etkenini bildirdi.
«Tuvğan Qırımı aqqında aytqan sözleri ayrıca tesirli oldı – evini, tuvğan yerlerini ne qadar sağınğanını ayttı. Bu 12 daqqa bir an kibi keçti. Sağlıqlaşıp, er keske selâmlarını ayttı... Qanunsızlıq ve adaletsizlik imkânlarımıznı tarlaştıra ve böyle ufaq körüngen şeylerge bile quvanmağa mecbur ete. Amma erte ya da keç er şey öz yerine qaytacaq – aqiqat kelecek, yalan ğayıp olacaq, qabaatsızlar ise serbest olacaq», – dep aytıla Lümanovanıñ haberinde.
2021 senesi Rusiye mahkemesi Amet Suleymanovnı «Hizb ut-Tahrir davası» boyunca 12 yılğa üküm etti.
Suleymanov sağlıq vaziyeti sebebinden üç yıl ev apsinde edi. Jurnalistniñ arterial ve mitral yürek yetersizligi bar, yürek klapanı deñiştirilmeli.
2023 senesi aprelniñ 6-nda Amet Suleymanov apiske alınıp, izolâtorğa qapatıldı. Advokat Emil Kurbedinovnıñ malümatına köre, Suleymanovnıñ baş ve yürek ağrıları ola.
2024 senesi mart ayında Vladimirdeki Frunze rayon mahkemesi Amet Suleymanovnı apishaneden azat etmedi. Onıñ hastalıqları ise apiste tutulmasına mania ola. Suleymanov uquqçılarnen beraber mahkeme qararına istinaf şikâyetini berdi.
«Memorial» aq qorçalayıcı merkezi Amet Suleymanovnı siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.