Qırımlı vatandaş jurnalisti Amet Suleymanovnıñ sağlıq vaziyeti Vladimirdeki apishanede pek fenalaşa. Bu aqta Ametke uzun körüşüvge barğan ömür arqadaşı Lilâ Lümanova «Qırım birdemligine» tarif etti.
Lilâ qayd etkenine köre, apishanede aqayı pek azdı, nefes zorluğı bar, aqcigerde ağrı bar ve ayaqları şişip başladı. Qırımlı bildirgenine köre, közleri ağırıp başladı. Amet Suleymanovnıñ hronik yürek, aqciger ve buğum hastalıqları bar.
«Onıñ hastalıqlarınen bu yahşı bir şey degil. Sebebini bilmek kerek, belki, revmatizm ya da qan basımı ve damar alâmetleri bar. Anda (apishanede – QA) tek közleri zarar körmey, közlerge bir şey ola», – dep tarif etti Lilâ Lümanova.
2021 senesi Rusiye mahkemesi Amet Suleymanovnı «Hizb ut-Tahrir davası» boyunca 12 yılğa üküm etti.
Suleymanov sağlıq vaziyeti sebebinden üç yıl ev apsinde edi. Jurnalistniñ arterial ve mitral yürek yetersizligi bar, yürek klapanı deñiştirilmeli.
2023 senesi aprelniñ 6-nda Amet Suleymanov apiske alınıp, izolâtorğa qapatıldı. Advokat Emil Kurbedinovnıñ malümatına köre, Suleymanovnıñ baş ve yürek ağrıları ola.
2024 senesi mart ayında Vladimirdeki Frunze rayon mahkemesi Amet Suleymanovnı apishaneden azat etmedi. Onıñ hastalıqları ise apiste tutulmasına mania ola. Suleymanov uquqçılarnen beraber mahkeme qararına istinaf şikâyetini berdi.
«Memorial» aq qorçalayıcı merkezi Amet Suleymanovnı siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
