Rusiye Federatsiyası tarafından mahküm etilgen arterial ve mitral yürek yetersizligi olğan qırımlı vatandaş jurnalisti Amet Suleymanov üç aydan berli ilâcsız qala – apayı yollağan ilâclarnı Vladimir vilâyetindeki №2 apishanege ketirmediler. Bu aqta dekabrniñ 1-nde «Qırım birdemligi» cemaat birleşmesi bildirdi.
Suleymanovnıñ ömür arqadaşı Lilâ Lümanovanıñ faallerge bildirgenine köre, aqayınıñ bulunğan yeri belli olğan soñ ilâc, ine ve eki ayğa yetecek ap yedegini topladı. Amma noyabrniñ soñunda Lilâ Lümanova yollağanını keri aldı.
«Episini taqip ettim. Poçtacı onı ketecek yerge bermege tırıştı, soñra teslim etilemedi, dep cevap berildi. <…> Bütün bu ilâclar – tedaviylev bile degil, [Amet Suleymanovnıñ] yüregine destek beride. Ne içün qabul etmegenlerini bilmeyim. Alamağan ilâclarına baqıp, Ametniñ sağlıq vaziyeti içün daa çoq qasevetlenem», – dep bildire Lümanovanıñ aytqanlarını «Qırım birdemligi».
Ne içün qabul etilmegeni aytılmay, Rusiyeniñ Cezalarnı yerine ketirüv federal hızmeti de vaziyetni izaatlamay.
2021 senesi Rusiye mahkemesi Amet Suleymanovnı «Hizb ut-Tahrir davası» boyunca 12 yılğa üküm etti.
Bu yıl aprelniñ 6-nda Amet Suleymanov apiske alınıp, izolâtorğa qapatıldı. Advokat Emil Kurbedinovnıñ malümatına köre, Suleymanovnıñ baş ve yürek ağrıları ola.
«Memorial» aq qorçalayıcı merkezi Amet Suleymanovnı siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
