Rusiye uquq qoruyıcıları tarafından aprelniñ 6-nda tutulğan vatandaş jurnalisti Amet Suleymanov mahsus blokta tutula – ilâcları alındı, olarğa ihtiyacı bar. Bu aqta «Qırım birdemligi» aq qorçalayıcı teşkilâtı haber ete.
Yürek hastası olğan qırımtatarı Bitsillin-5 ilâcına muhtac, onı üç aftada bir almaq kerek. Lâkin SİZOğa ketirilgende Suleymanovnıñ bütün ilâc ve ineleri alındı, dep haber etile.
«Şimdi mesele bu, nasıl olacaq, kim yapacaq, birisi yapacaqmı?», – dep qayd etti ömür arqadaşı Lilâ Lümanova. Suleymanovğa ilâclarnıñ bir qısmını yanında qaldırmağa izin bergenler – olarnı er kün içe.
«Tütün qoqusı olğan bu mağazda eki afta bulunması nefes darlığı ve öksürik sebebi oldı», – dep ayttı apayı Lilâ Suleymanova.
2021 senesi Rusiye mahkemesi Amet Suleymanovnı «Hizb ut-Tahrir davasına» istinaden 12 yılğa üküm etti.
Suleymanov sağlıq vaziyeti sebebinden 3 yıl ev apsinde edi. Jurnalistniñ yürekniñ arteriya ve mitral yetmemezligi bar, yürek klapanı acele deñiştirilmeli.
Bu yıl aprelniñ 6-nda Amet Suleymanov apiske alınıp, izolâtorğa qapatıldı. Advokat Emil Kurbedinovnıñ malümatına köre, Suleymanovnıñ baş ve yürek ağrıları ola.
«Memorial» aq qorçalayıcı merkezi Amet Suleymanovnı siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
